Rokstu sagataveja: portals lakuga.lv

Tyvojās 27. marts – Storptautyskuo teatra dīna. Itūgod DAUGOVPIĻS TEATRIS ir sagatavejs nazcik eipašu puorsteigumu, kai informej teatra sabīdryskūs attīceibu specialiste, lai skateituoji i vysi ar teatri saisteitī cylvāki martu pavadeitu prīceigā nūskaņuojumā.

Vysu marta mienesi Latgolys Centraluos bibliotekys Dailliteraturys sektorā (Reigys īlā 22a, 2. stuovā) apsaverama Storptautiskajai teatra dīnai veļteita gruomotu izstuode “Daugavpils teātra grāmatu izlase: Izlasi redzēto, noskaties izlasīto!”, kuramā var īsapazeit ar vysom tom gruomotom, kurys beja īdvasmuojušys režisorus radeit Daugovpiļs teatra izruodis.

Pie teatra kasis ir organizāta eipaša vīta, kur radūši var izapaust sevkurs teatri meilūšs skateituojs. 27. martā skateituoju nūvieliejumi tiks prezentāti vysam Daugovpiļs teatra kolektivam. Taipat marta laikā teatra socialajūs teiklūs tiks organizāti vysaidi konkursi, partū sekojit leidza jaunumim i pīsadolit.

29. martā 18.30 stuņdēs iz teatra Eksperimentaluos skotivis nūtiks pyrmizruode īstudiejumam “Metallyužni”. Izruodis režisore i lugys autore ir Alla Korovkina (Krīveja), kura pārņ īstudēja Daugovpiļs teatrī izruodi “Nagaiss”.

Izruode viestej par treju sīvīšu liktinim. Caur smīklim i osorom juos daleisīs sovūs stuostūs, kurymūs mīlesteiba i suope salaidynuotys kūpā – nadolomys. Dzeive ir kai metallyužņu izguoztive – te var atrast i vierteigus metalus, i saryusiejušys nalītys. Bet kai nadalaist klaidu, izalosūt vajadzeigū?! Sevkura nu izruodē tāluotūs sīvīšu meklej atbiļdi iz itū vaicuojumu. Izruodis lūmys atveiduos aktrisis Jeļena Ņetjosina, Žanna Lubgāne i Irina Kešiševa. Zeimeigi, ka vīnu nu lugā apraksteitūs nūtikšonu režisore pīdzeivuojuse taišni Daugovpilī – pyrmū mīlesteibu i škieršonuos suopi. Taidys jiutys ari cauri godim teik ryupeigi globuotys sevkurys sīvītis sirdī, partū lugys īstudiejums Daugovpiļs teatrī režisorei ir eipašs.