Rokstu sagataveja: portals lakuga.lv

Puorsaverūt Daugovpiļs piļsātys pošvaļdeibys turisma atteisteibys i informacejis agenturys daudzveideigū kulturys nūtikšonu pīduovuojumu, gribīs izceļt Latgolys personeibom veļteituos izstuodis.

Daugovpiļs Nūvodpietnīceibys i muokslys muzejs (Reigys īla 8) pīduovoj Aleksandra Madelāna (1925–2018) pīmiņai veļteituo izstuode “Mīlēt Dievu un kalpot cilvēkiem”, kas apsaverama da 22. juņa. Izstuodē apsaverami vairuok kai 100 prīškmati, dokumenti i fotografejis nu bazneickunga kruojuma.

A. Madelāns pīdzyma 1925. gods 5. martā daudzbārnu saimē ar styprom katuoliskom tradicejom. Voicejuos Aizpurīšu pamatškolā, vāluok īsastuoja Aglyunys gimnazijā, nu kurīnis 1944. godā īsaukts padūmu armejā. Karuoja 43. latvīšu gvardis divizejā, froņtē īvainuots, sātā atsagrīze kai 2. grupys invalids. Piec gimnazejis absolviešonys 1946. godā īstuoja Reigys katuoļu Goreigajā seminarā.

1949. godā īsvieteits par prīsteri i palyka par Reigys Sv. Aļberta draudzis vikaru. Nu 1960. gods beja dekans Greivys katuoļu bazneicā, kur kolpuoja 20 godus. Nu 1980. da 2014. gods beja  Daugovpiļs Sv. Pītera kēdēs draudzis dekans. Jis īmontuoja daugovpilīšu atzineibu ar sovu aktivū i patriotiskū dzeivis poziceju, pīsadaleja daudzūs svareigūs sabīdryskūs pasuokumūs. 1999. godā sajēme 50 prīstereibys godu gūda zizli, apbolvuots ar Pūlejis  vaļsts Nūpalnu Zalta krystu (2003), Daugovpiļs piļsātys dūmis titula īgiviejs “Goda daugavpilietis” (2005), IV škirys Treju Zvaigžņu ordini (2009), pošvaļdeibys bolvu “Par mūža ieguldījumu” (2013).

Muzejā “Ebreji Daugavpilī un Latgalē” (Cītūkšņa īla 38, pyrma apmekliejuma dasasaceišona, zvonūt pa t. +371 29548760) da 31. decembra apsaverama izstuode “Izcilie Latgales ebreji”. Pīcūs stendūs ir izvītuota informaceja par 125 izcylim ebrejim, kas dzymuši, vuicejušīs, struoduojuši, prūtams, ari dzeivuojuši ci vys vēļ dzeivoj Latgolā – Daugovpilī, Rēzeknē, Ludzā, Kruoslovā, Jākubpilī (Krustpiļs), Leivuonā i c. Latgolys piļsātuos. Partū izstuode ir interesanta na viņ daugovpilīšim, bet ari plašuokai publikai.

Daugovpiļs Marka Rotko muokslys centrā sūpluok sezonys izstuodem pastuoveiguo ekspoziceja “Marks Rotko. Dzīve un Māksla”. 26. aprelī muokslys centrs atzeimēs sešu godu pastuoviešonys godadīnu. Nu 11.00 da 19.00 stuņžu par gūdu dzimšonys dīnai, duovynojūt zeimiešonys albumu, sevkuram byus vareiba apmeklēt Rotko centra ekspozicejis bez moksys. Puorejim apmaklātuojim īeja par akcejis cenom: maineiguos izstuodis (sektori B, C, D kūpā) par 1,50 eiro, (sektors A) par 3 eiro. Vysa Rotko centra apmekliejums par 4,50 eiro. Īeja pasuokumūs bez moksys.