19. “Vuolyudzāni” i atkluotuo olimpiade latgaliskuo zynuošonā nūtykuši
Roksta autors: portals lakuga.lv
Rēzeknē 13. aprelī 19. reizi nūtyka skotivis runys konkurss “Vuolyudzāni” i atkluotuo latgalīšu rokstu volūdys i kulturviesturis olimpiade. Vysaidu vacumu bārni i jaunīši, 51 piec skaita nu 25 Latgolys školu, sasaceņte prasmē deklamēt latgalīšu tekstus, bet 9 vydsškolānu komandys – latgalīšu rokstu volūdys, literaturys i kulturys nūtikšonu zynuošonā.
Nikas tai naroda stabilitatis sajiutu kai dajiuktu lītu atsakuortuošona. Nu goda godā pasuokuma sātys saiminīki ir Rēzeknis Vaļsts 1. gimnazeja, koč itūreiz lelūs remontu deļ na sovuos telpuos, bet Viļānu īlā 2. Gimnazejis direktors Juoņs Poplavskis sēdēs pi klavīrem. i vyss tradicionali suocēs ar kūpeji nūdzīduotu Eugeņa Karūdznīka i Annys Rancānis par naoficialu himnu palykušū “Skaidrū volūdu”. Tod eisi apsveikuma vuordi nu Latgalīšu volūdys, literaturys i kulturviesturis školuotuoju asociacejis i Rēzeknis nūvoda pošvaļdeibys, i pi dorba.
Olimpiadis žureja – LU profesore Lideja Leikuma, RTA profesore, niule izgleiteibys i zynuotnis ministre Ilga Šuplinska, žurnaliste, niule portala lakuga.lv redaktore Sandra Ūdre – aizdavumus veidoj pīcuos kuortuos, lai kotrā varātu salaseit 20, a kūpā 100 īspiejamūs punktus. Uzvarātuoji golā salaseja 67 punktus, a deveitī piec reitinga – 45,5.
1. kuorta tradicionali ir volūdys aizdavumi par pareizraksteibu i gramatiku profesoris L. Leikumys puorziņā. Ite liderūs izaruove obejis Nautrānu vydsškolys komandys (2. komanda salaseja 17,5 punktus, 1. komanda – 14,5) i Drycānu vydsškolys komanda (14 punkti). Profesoris Ilgys Šuplinskys veiduotuos literaturys kuortys beja veļteitys ituogods jubilaris Annys Rancānis dailradei i Raibuo dzejis gruomotai “Pistacejis”. Atslāga (vuordu) atrasšona Annys dzejis i prozys tekstim vyslobuok pasadeve baļtinovīšim (6,5) i drycānīšim (5,5), obejom Nautrānu komandom (pa 5 punkti). Sovutīs ar Raibuo tekstim Viļānu Muzykys i muokslys školys komandai nūsalūbe dabuot 16,5 punktus, Nautrānu 1. komandai –16 punkti, tok 15,5 punkti – Nautrānu 2. komandai i baļtinavīšim.
4. kuortā par pasauļa popularuokūs gruomotu tulkuojumim latgaliski – Luisa Kerola “Alise Breinumu zemē” i Antuana Sent-Ekzeperī “Mozais priņcs” – Sandra Ūdre sagataveja aizdavumu, kurymā vajadzēja atrast faktu klaidys i juos izlobuot. Itys darbeņš lūbēs gona labi: obejis Rogovkys komandys salaseja pa 15 punktim, Viļānu vydsškolys komanda – 14 punktus, Drycānu, Baļtinovys, Rēzeknis Vaļsts gimnazejis komandys – pa 12 punktim. 5. kuortys kulturys nūtikšonu tests tradicionali ir par paguojušuo gods jubilejom, pasuokumim, gruomotom, diskim, filmom, “Boņuka” laureatim. Partū ir vārts vysu godu sekuot leidza portala lakuga.lv jaunumim. Itamā kuortā salaseitī punkti: baļtinovīšim – 15, Nautrānu 1. komandai – 14, Tiļžys vydškolys i Kruoslovys Vaļsts gimnazejis komandom – pa 13.
Vuolyudzāni aba skotivis runys konkursa pīsadaleituoji trejuos vacuma grupuos sasaceņte individuali. 5.–8. i 9.–12. klašu grupu žurejis lūcekle Ineta Urtāne: “Itūgod nabeja cīš spylgtu personeibu, saceisim “žvaigžņu”, par kū vysai žurejai izreiz byutu vīnys dūmys – itys ir lobuokais. Bet varēja redzēt, ka “vuolyudzāni” ir auguši tekstu izalaseišonā, teksti atbylst bārnim, tys juosoka taišni par pamatškolys vacuma grupu. Partū bārns var lobuok atsaraiseit, dūmoju, beja interesanti ari skateituojim nu molys, jī dzierdēja vysaidus tekstus. Naparosti, ka itūgod vairuok beja prozys tekstu. Pruotā palyka tys pats izmontuotais A. Sent-Ekzeperī tulkuojums ar aktermuokslys elementim, Ilzis Spergys proza. Bārnim pat saguoja paceļt patriotiskū temu, kas nikod nav vīgla, ar Ontona Kūkuoja tekstim. I tai garšeigi deļ jaunīšu.
Maņ patyka ari vysys laureatu uzastuošonys piec diplomu i duovonu sajimšonys. Jī tai atsataiseja, eipaši puiši, ruodeja augstuokū pilotažu. Iz reizis ar energeju, miļzeigu liecīni iz augšu. Tai ka palīliešona i atzineigi vuordi vajadzeigi kotram.”
Nūtikšonu finansiali atbaļsteja Rēzeknis nūvoda pošvaļdeiba, vysim bolvys sagoduoja žurnals “A12” i Latgalīšu kulturys bīdreiba olimpiadis komandom T-kraklus.
