Rokstu sagataveja: portals lakuga.lv

Mārgu grupa “Trešīs Ņutona lykums” Juoņu laikā publiciejuse video dzīsmei “As nadaguliejs”, kas ir latgaliskuo verseja grupys “t.A.T.u” dzīsmei “Нас не догонят” (latgaliski “Myus nadadzeis”).

Dzīsmis vuordu autors ir Gunārs Indričāns, vaira pazeistams kai DJ Guntix. “Izlēmem, ka gribim atdzeivynuot gon sovys bierneibys i jauneibys, gon pasauļa hitu cytā skatiejumā partū, ka mūde ir cikliska i piec kaidys šaļtenis topā atsagrīž daudzys ogruok klauseituos i mīļuotuos dzīsmis,” stuosta vīna nu grupys dalineicu Sintija Augustova.

Grupa video izlāmuse izlaist Juoņu laikā partū, ka svātku svynātuoji bīži viņ ļustejās vysu nakti i nuokušajā dīnā ir nadaguliejuši i nūguruši. “Saprotom, ka itys laiks byutu cīši atbylstūšs gon dzīsmis tematikai, gon ari Juoņu i Leigū sviniešonai. Ar videoklipu gribim aicynuot cylvākus uzmaneigi svinēt svātkus, dūmojūt gon par sovu, gon par tyvuokūs cylvāku veseleibu, drūšeibu i lobsajiutu,” soka Sintija.

Kab ideju puorvārstu par video, cīteigi struoduojušys gon grupys dalineicys, gon akteri – Edvards Daugulis, Jana Kozule, Nikolajs Semenecs, Viviāna Tāraude i Sintija Augustova.