Rokstu sagataveja: portals lakuga.lv

Latgaliski raksteitgrybātuoji kas pa šaļteņai aizdūd vaicuojumu: “Kuru gruomotu es varu puorskaiteit, kab īsavuiceitu pareizi raksteit latgaliski?” Iz reizis juosoka, ka taidys vīnys gruomotys, kura dūtu atbiļdis iz vysim vaicuojumim, nav. Par daudzu vuordu pareizraksteibu vēļ nūteik diskusejis pošu volūdnīku vydā. Tok, nasaverūt iz tū, ir pīejami materiali, kas var paleidzēt izprast daudzus pareizraksteibys vaicuojumus i uzlobuot rokstu volūdu. Portals lakuga.lv pīduovoj dažaidu leidzekļu, kas daeinami škārsteiklā, apkūpuojumu.

Vysu pyrms kotram latgaliski raksteitgrybātuojam vajadzātu suokt ar 2007. godā apstyprynuotajim Latgalīšu raksteibys nūsacejumim. Tys ir pamats, iz kura myusu dīnuos bolstās volūdnīku, školuotuoju i latgalīšu volūdys entuziastu veiduotī vuiceibu materiali.

Myusu dīnu raksteibys nūsacejumus izstruoduojuse Vaļsts volūdys centra Latvīšu volūdys ekspertu komisejis Latgalīšu ortografejis apakškomiseja. Raksteibys nūsacejumu mierkis ir tyvynuot raksteibu tautā runuotajai volūdai, vīnlaikus respektejūt īprīkš pastuovūšu raksteibys tradiceju, kurys pamatā ir Izgleiteibys ministrejis 1929. godā apstyprynuotī Latgalīšu raksteibys nūsacejumi (t. s. Stroda ortografeja).

2007. godā apstyprynuotī Latgalīšu raksteibys nūsacejumim daīmami vītnē likumi.lv i termi.lv/lg.

Tok drukuošonai ārtuoki byus gruomatenis formatā sagataveitī nūsacejumi, kas daīnami ite.

Latgalīšu rokstu volūdys apgivē vierteiga ir gruomota “Vasals!”, kas suokūtneji izdūta taustomā formā, tok daīmama ari PDF formatā. Gruomotā izskaidruota gramatika i ari latgalīšu fonetika.

Volūdys apgivei izmontojami Lidejis Leikumys sastateitī intensivuo kursa materiali, kas daīmami ite.

Kotram latgaliski raksteitgrybātuojam nūdereigs byus pošvuiceibys leidzeklis “Vuicīs raksteit latgaliski!”. Tymā izskaidruoti raksteibys nūsacejumi ostoņu nūdarbeibu veidā, dūti pīmāri i ari aizdavumi. Vuiceibu leidzekļam daeinams atbiļžu kruojums, kurymā var puorbaudeit aizdavumūs īkļautūs vuordu pareizraksteibu. Pošvuiceibys leidzeklis daīnams ite, atbiļdis ite.

Skaiteit i raksteit latgaliski ir vareiba ari pošim mozuokajim. Ite nūdereiga byus digitaluo latgalīšu ābece “Skreineite”, kas izveiduota divejuos daļuos – “Vuicūs raksteit” i “Vuicūs laseit”. Gruomota izveiduota ari drukuotā formatā i nūpierkama veikalūs.

Suokumškolys školānim ir vareiba apgiut latgalīšu rokstu volūdu ar leidzekļa “Olūteņš” paleidzeibu. Elektroniskajā vuiceibu leidzeklī īkļauta ari interesanta i vierteiga informaceja par latgalīšu volūdu i Latgolys kulturu, viesturi, kas byus saistūša ari vacuokim bārnim i pat pīaugušajim. Vuiceibu leidzeklis “Olūteņš” daīnams ite, tam sagataveiti ari metodiskī īsacejumi, kas daīmami ite.

Vierteigus padūmus var atrast ari latgalīšu volūdai veļteituos sātys lopuos. “Latgalīšu daslēdzis školys” lopā lynuojs.wordpress.com snāgts skaidruojums par alfabetu, izskaidruota dažaidu vuordškiru gramatika. Lopā var atrast ari vysaidys frāzis latgaliski i puorskaiteit literarus dorbus latgalīšu rokstu volūdā.

Lopā ltgnui.com ir atrūnami aizdavumi, materiali, idejis, kas paleidz vuiceit i popularizēt latgalīšu rokstu volūdu školuos i kursūs.

Vīns nu leluokūs paleigu kotram latgaliski raksteitgrybātuojam byus Lītuvīšu-latvīšu-latgalīšu vuordineica hipilatlit.ru.lv. Īrokstūt maklātuojā vuordu latvīšu literarajā volūdā, vuordineica pīduovuos latgaliskū vuordu pat dažaidūs škierkļūs. Tok juojam vārā, ka itamā vuordineicā nav īkļauti ni vysi latvīšu literaruos volūdys, ni latgalīšu rokstu volūdys vuordi.

Kam lobuok pateik vuordu tematisks izkuortuojums, var pasavērt “Latgalīšu-latvīšu-krīvu sarunu vuordineicu”. Papeira formatā jei izdūta 2008. godā.

Daudzeji latgaliskūs vuordu olūti apkūpuoti “Baļtīšu-latgalīšu vuordineicā” vuordineica.lv. Izmontojūt vuordineicu, mekliešonys lūdzeņā īrokstoms vuords latvīšu literarajā volūdā. Tok te var atrast ari pavysam nasaprūtamus latgalīšu jaunvuordus.

Nūdereiga var izaruodeit ari volūdnīka i bazneickunga Pītera Stroda sastateituo “Pareizraksteibys vōrdneica”. Tok svareigi jimt vārā, ka vuordineica veiduota, īvārojūt 1929. godā apstyprynuotūs pareizraksteibys nūsacejumus, kas nadaudz atsaškir nu myusu dīnuos lītuotuos raksteibys.

Par atseviškom temom skaidrojūšus rokstus var atrast portala lakuga.lv arhivā. Īskotam daži.

Kai pareizuok – „snīga stuņdinīceni” ci „snīgpuļkstineiši”?
Kai pareizi pīraksteit mienešu nūsaukumus?
Latgola ci Latgale – kai pareizuok raksteit?
Kai latgaliski pīraksteit nedelis dīnys?
UO i Ō. Kurs pareizuoks?
Baze voi bāze, Modyuna, Modūne voi Modūna?

Pyrms vairuoku godu “Latgolys Radejā”skanēja cykls “Volūdys vaicuojums”, kurymā žurnaliste Maruta Latkovska skaidruoja dažaidus latgalīšu volūdys vaicuojumus, tī daīmami lakuga.lv arhivā i puorskaitomi.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.