Rokstu sagataveja: portals lakuga.lv

Eisi pyrma koncerta “Rūbeži” grupa “Bez PVN” prezentej jaunu muzykys video dzīsmei “Apveļc!”. Goda leluokais nūtykums grupai paradzāts 26. oktobrī Latgolys viestnīceibā GORS. Vysi beleti iz koncertu jau ir izpuordūti, atkluoj grupys puorstuovs Guntis Rasims.

Par dzīsmis “Apveļc!” ideju grupa soka: “Mes kotrys dzeivojom sovā, pošu īdūmuotu rūbežu, lineju i apvylktu riņču pasaulī. Nu vīnys pusis itī rūbeži ļaun myusim justīs drūši, nu ūtrys – myus napuortraukti īrūbežoj. Lels izaicynuojums vysod ir atrast leidzsvoru, lai rūbeži tevi gon sorgoj, gon i ļaun augt i atsateisteit vysys dzeivis garumā. Nasabeistam tuos “īdūmu linejis” ik pa laikam paplašynuot. Nasabeistam dzeivuot!”

Dzīsmis muzykys i vuordu autors ir Kristaps Rasims, tei īraksteita studejuos “Hodila Records” i “Reiga”, dzīsmi miksēja Krišjānis Geidāns, masterēja Kaspars Ansons.

Video idejis autori ir poši grupys dalinīki, operators ir Ivars Utināns, gaismu inžiners – Justs Ribinickis.

Grupā “Bez PVN” dorbojās Kristaps Rasims (bolss, bandžo), Guntis Rasims (bolss, akordeons), Jurs Vucāns (bolss, elektriskuo gitara, samplers), Valdis Vucāns (basgitara) i Normans Bārbals (bungys).

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.