Roksta autors: portals lakuga.lv

Treis muosys Laima Maslova, Liene Brence i Marta Igaune apsavīnuojušs muzykalā projektā ar simbolisku nūsaukumu “Muosys”. Nupat juos publiciejušys sovu pyrmū dzīsmi “Zynu, zynu tāva sātu”.

Grupa “Muosys” izaveiduoja i suoce sovu darbeibu jau 2016. godā ar Igauņu saimis diska prezentaceju i koncertu “Vysi zīdi pļaveņā” koncertzālē GORS. Itys koncerts deve impulsu tuoļuokajai mārgu darbeibai, i piec tuo muosys suokušys bīžuok tiktīs i muzicēt taišni trejatā. Pavysam naseņ “Muosys” publicēja sovu pyrmū dzīsmi. “Dzīsme “Zynu, zynu tāva sātu” tyka īraksteita pyrms kaida laika i beja taida sajiuta, ka juosagaida jaunuokuo muosa Laima atsagrīžam Latgolā, i tod tei dzīsme ari izskanēs i aizīs ar tū dziļū dūmu i viesti nu myusu,” stuosta Marta Igaune.

Laimai, Lienei i Martai ir tyva latgalīšu tautys muzyka. Tei guojuse jom leidza vysus godus, spielejūt kūpā ar vacuokim Igauņu saimis koncertūs i gūdūs. “Par tū tautiskuo muzyka ir jau “īauguse” myusūs i iz ituo pamata tūp jaunys latgalīšu tautys muzykys arandžejis, teik komponātys jaunys melodejis, kas myusim ari pateikt i veidoj myusu repartuaru,” soka Marta. “Muzyka ir īdvesmuojūša, tei paleidz izkrošņuot kasdīnu, dūd spāku, ari vuica komunicēt, caur tū var īpazeit, gon sovu, gon cytu pasauļu tradicejis.” Bez muzykys vysom trejom muosom ir ari cytys aizaraušonys – ceļuošona, dažaidys sporta aktivitatis i skaistumkūpšona. Jom ari pateik daudz laika pavadeit kūpā, stuņdem ilgi apsarunuot pi čaja, generēt jaunys idejis i atbaļsteit vīnai ūtru,” atkluoj Marta.

Laimys i Lienis profesionaluo dzeive ir saisteita ar muzyku, juos obejis ir pabeigušys Latvejis Muzykys akademeju i niu struodoj Ludzys muzykys pamatškolā, bet Liene ir Rēzeknis muzykys vydusškolys vuiceibu spāks. Marta ir pabeiguse Rēzeknis muzykys pamatškolu, bet sevi profesionali pilnveiduojuse ar muzyku nasaisteituos jūmos.

Lelūs nuokūtnis planus pagaidom grupys dalineicys naatkluoj, viņ pībylst, ka ir planavuots īraksteit jaunys dzīsmis, ar kurom prīcynuot klauseituojus i pošom sevi. Grupai “Muosys” jau ir izaveiduojuse sadarbeiba ar horeografu Ilmāru Dreli, kurs ir izveiduojs iz jūs pyrmuos dzīmis pamata deju Daugavpils tautys deju ansambļam “Laismeņa”.