Rokstu sagataveja: portals lakuga.lv

2019. gadā izguojušais Ligijis Purinašys pyrmais dzejūļu kruojums “Sīvīte” jau sajiems latgalīšu kulturys gods bolvu “Boņuks 2019”. Niule Latvejis Literaturys gods bolvys (LALIGABA) sātys lopa viestej, ka vīna nu četru debejis nominantu ir  “Sīvīte”.

Pīduovojam citiejumus nu publicātūs ekspertu viertiejumu. Rakstnīks i literaturkritiks Guntis Berelis: “Lai ari nasajiutu spiejeigs sprīst par pošreizejū latgalīšu dzejis kontekstu, tok redzīs, ka Ligijis Purinašys debejis kruojums “Sīvīte” kūpainu varātu nadaudz pamaineit. (..) Ite tradicionalismu – voi varbyut tei ir tradicionalisma stilizaceja? – piļneibā pīveic dzejis skaniskums. Itys nu ir tys gadejums, kod par skaniskumu voi volūdys muzyku var runuot kai par cīš byutisku poetiku formejūšu faktoru, partū ka dažs dzejūļs redzīs dreizuok izdzīžams, pituo vietom pavysam sovpateigus akcentus cytaiži vyscaur latgaliskajā kontekstā izlīk, redzīs, apzynuotuo svešvuordu lītuošona.”

Dzejneica Ieva Rupenheite: “Nalelā nasaprūtameibā, prūtams, ir sova burvesteiba, taida kai sudobra veļuma, myglys pleivura kluotīne. (..) Dialekta valdzynuojums vītom pasorgoj eilis, kas bez vylta uzrunoj jaunys sīvītis bolsā, tok puorsvorā meikstais skaniejums (partū ka nalatgalīšam itys dzejūļu kruojums ir juolosa bolsā, cytaiž vyspuor nikuo navar saprast) aizraun. Dzejūli ir spridzeigi, ar volūdys prīcu raksteiti, i izguojīņam iz literaruos skotivis cīš pīstuov taida cytaideiba. Tok ir koč kas, kas dora namīreigu, – ka kaids izdūtu dzejūļu kruojumu, pīmāram, tāmnīku dialektā, voi tys ari tyktu vysā nūpītneibā vārtāts? Tā viš i.”

Dzejneica Evija Gulbe: “Sīvītis dūmys i jiutys, juos spieja i īspiejis par jom runuot, viestej na viņ par sīvītis dzeivi kaidā konkretā laikā i vidē, bet ir vīns nu lelumu, kas raksturoj laikmata sabīdreibu kūpumā. L. Purinašys dzejis kruojums ir emocionals sīvītis pasauļa pasavierīņs i sajutums, kas pausts na viņ latgalīšu, bet ari sīvītis dvēselis volūdā, i tai saista vysu laiku sīvītis.”

Kruojuma autore Ligija Purinaša par atsarasšonu nominantu vydā: “Munā gadejumā latgalīšu volūda ir ir veids, kai es komuniceju ar pasauli. Naasmu dzerdejuse, ka teksti byutu švakuoki viņ deļtuo, ka jī latgaliski voi ka jūs kaidi cylvāki nasaprūt. Ieva Rupenheite raksteja, ka jei leidz golam kaut kū nasaprūt, bet leluokū daļu tekstu jei taipat ir saprotuse. Tys līk dūmuot, ka interese ir i tod, kod vajag, var ari izlaseit. Es kai latgalīte storp puorejim nasajiutu kai minoritate, tys zeimoj, ka kaidi procesi kustīs iz prīšku, ka latgalīšu literatura reali palīk par latvīšu literaturys byutisku daļu. Lai tys prīškstots atsateista, ka latgalīšu literatura ir konkurētspiejeiga i nav deļ muzeju i nūputiejušu plauktu.”

Īsnēgt dorbu bolvai pamudynuojuse gruomotys redaktore Ilze Sperga: “Vīnkuorši pasaceju, lai snādz. Es mudynoju autorus snēgt sovus dorbus bolvai vysod, kod izdūts sakareigs i vierteigs teksts. Lai žurejai, cylvākim, kas viertej latvīšu literaturu, ir stimuls laseit latgaliski. Kai cytaiž jī puorskaiteitu Ligijis dzeju? Nu naskaiteitu symtu godu, tai jī ir spīsti tū dareit.  Tū vajag, lai latgalīšu gruomotys īīt apritē, lai naapsarūbežoj ar latgalīšu gruomotu goldu, lai paruodom, ka latgalīšu literatura nav kas regionals i lokals, a tei ir vysys Latvejis literatura. Durovys ir vaļā, bet, ka mes poši tī naīsim, nivīns myus tī ari napraseis. Breineigi, ka Ligijis vuords izskaņ, i gruomota latgaliski, i loba gruomota. Jau nominaceja ir sasnāgums, partū ka Latvejā izīt cīš daudz gruomotu.”

LALIGABA ir nūzeimeiguokuo gods nūtikšona literaturys nūzarē Latvejā, jei nūdrūsynoj literarūs dorbu profesionalu izviertiejumu i atzineibys izsaceišonu autorim par izcyluokajim dorbim, kuri gods laikā publicāti Latvejis rakstnīceibā. LALIGABA bolvu īgiviejus aizkluotā bolsuojumā nūsaceis ekspertu komiseja, i laureati tiks paziņuoti eipašā LALIGABA bolvu padūšonā, kas byus radzama LTV1 kanalā 30. aprelī 21.05. stuņdēs. Bolvu īgivieji sajims dizaina studejis “Mājo” veiduotū LALIGABA lampu i naudys bolvys. Bez L. Purinašys ar dzejūļu kruojumu “Sīvīte” iz LALIGABA debejis nominacejā vēļ pretendej: Rvīns Varde ar eisprozys kruojumu “Kas te notiek”, Raimonds Ķirķis ar dzejūļu kruojumu “Kartes”, Aivars Madris ar dzejūļu kruojumu “Zonas”.

Latgalīši ir sajāmuši LALIGABA specialuos bolvys: Anna Rancāne par dzejūļu kruojumu “Pylni kārmani dabasu / Bezdelīgu pasts” “Speciālbalvu Latvijas literatūrā 2013”; sovutīs “Speciālbalvu Latvijas literatūrā 2012” par dzejūļu kruojumu “Bolti burti” –  Valentins Lukaševičs (tūgod padeve  taidys 5 bolvys). Debejis nominantūs ir bejušys: Anita Mileika ar bilingvalū dzejūļu kruojumu “Mūžīgā nepārtikusī stirna” (2016), Ilze Sperga ar stuostu kruojumu “Dzeiveiba” (2015), Iveta Ratinīka ar nalatgaliskū dzejūļu kruojumu “Rūgts” (2012). Sovukuort Raibuo dzejis kruojums “PISTACEJIS” (2018) bejs nomināts kategorejā “Lobuokuo dzeja”.