Roksta autors: portals lakuga.lv

7. majā Storptautyskuo suomugru jaunatnis asociaceja aicynoj iz latgalīšu volūdai veļteitu vebinaru, kurymā uzastuos muzikis, Latgolys kulturys i sabīdryskais darbinīks Arņs Slobožanins.

Storptautyskuo suomugru jaunatnis asociaceja apvīnoj dalīnikus nu Krīvejis, Igaunejis, Suomejis i Ungarejis. Organizaceja dorbojās jau nu 1990. gods, i tuos mierkis ir atbaļsteit Uralu tautu volūdu i kulturys atteisteibu, styprynuot sadarbeibu storp dažaiduos vaļstīs i vītuos dzeivojūšajom Uralu tautom, kai ari aizstuovēt pyrmīdzeivuotuoju interesis.

Darbeibys ītvorūs asociaceja eistynoj ari izgleiteibys programu, kurys mierkis ir popularizēt Uralu tautu volūdu i kulturu i cytus aspektus. Tykuši reikuoti vebinari par Uralu volūdom, Uralu tautu kulturu i viesturi, par dažaidu pasauļa volūdu saglobuošonu, atdzeivynuošonu i cytim vaicuojumim, portalam lakuga.lv nūruoda organizacejis puorstuovs Artjoms Malihs, pībylstūt, ka dažaidu volūdu lītuotuoji sasakar ar leidzeigim izaicynuojumi i vīns nu ūtra var vuiceitīs, kai ar tim tikt golā.

Organizaceja jau īprīšk reikuojuse vebinarus par sābru vaļstīs lītuotajom minoritašu, regionalajom i mozuoklītuotajom volūdom, tymā skaitā par veru volūdu Igaunejā. Partū dūmuots vīnu nu nūdarbeibu veļteit latgalīšu volūdai.

Škārsteikla nūdarbeiba “Latgalīšu volūda: viesture i statuss myusu dīnuos” nūtiks angļu volūdā 19.30 stuņdēs (Reigys laiks), tymā uzastuos muzikis, latgaliskuos kulturys aktivists Arņs Slobožanins. Nūdarbeibai juopīsaregistrej vītnē mafun.clickmeeting.com/latgalian/register.