Roksta autors: portals lakuga.lv

16. majā deveņuos stuņdēs vokorā piec Latvejis laika aplikacejā “Zoom” nūtiks jau ūtrais pasauļa latgalīšu saīts “Saliduojums bez liduošonys”. Pasuokumu vāruot varēs i uorpus “Zoom”.

Vīna nu saliduojuma organizatoru Aija Mežale stuosta, ka ideja par uorzemēs dzeivojūšūs latgalīšu sasatikšonom škārsteiklā roduos jau pyrma vairuokim godim, kod, pasateicūt Eiropys Latvīšu apvīneibai, diasporā aizasuoce vēļ vairuok jaunu aktivitašu.

“Īrejā dzeivojūšuo Ingrida Anna Tārauda ir itūs pasuokumu dziniejspāks, kas jau kaidu laiku grib īkustynuot Īrejis latgalīšus. Ideja par saliduojumim konferenču platformā “Zoom” roduos kaidu laiceņu pyrma Latgolys kongresa dīnys,” atzeist Aija.

Virtualuos sasatikšonys “Saliduojums bez liduošonys” mierkis nav “puorlatgaliskuot” uorzemu latvīšus vai sprīst, kurs ir eistuoks latgalīts, pīpraseit runuot rokstu volūdys lykumūs baļsteitā latgalīšu volūdā. Saīta organizatoru golvonuo vēļme ir savest kūpā vysdažaiduokūs cylvākus, lai varātu raiseitīs vysinteresantuokuos sarunys.

Pyrmais “Saliduojums bez liduojuma” nūtyka 2. majā, tymā pīsadaleja apmāram divi desmiti cylvāku nu Īrejis, Vuocejis, Itālejis, kai ari Latvejis.

Dalinīki varēja īsapazeit vīns ar ūtru tyvuok. Saliduojumā kotrys tyka pi vuorda, spēlēja gon īsasiļdiešonys spēlis, gon pasadaleja ar sovom idejom attīceibā iz latgaliskū, puordūmom par tū, cik dažaidūs veidūs nūnuokuši pi latgaliskuo.

Aija stuosta: “Myusim svareigi beja, ka cylvāki var pasarunuot napīspīstā atmosferā. Dažreiz nav vajadzeiga plaša kulturys programa, lai saītu kūpā, partū mēs lobu pruotu pīaicynuotu kaidu uorzemu latgalīti vēļ nu kaidys cytys vaļsts, lai kūpīna augtu.”

Ūtrais “Saliduojums bez liduošonys” nūtiks 16. majā deveņuos stundēs vokorā piec Latvejis laika, arī Zoom platformā, bet itūraiz sarunai pīsavīnuos žurnaliste Ausma Sprukte, akters Dāvis Suharevskis i hiphopa muokslinīks Būrs jeb Armands Buļs. Iprīkš registrātī dalinīki varēs aizdūt sovus vaicuojumus saliduojuma gostim.

“Mieginuosim salidojumu translēt aplikacejā “Facebook”. Bārnu aizsardzeibys dīnā dūmojom reikuot pasuokumu ari bārnim. Paļdis juosoka myusdīnu tehnologejom, kas pandemejis laikā paver īspiejis gondreiž bez moksys i lelys planavuošonys savest kūpā cylvākus nu dažaidu pasauļa molu. Škārsteikla konferencis dūd īspieju svinēt latgaliskū, naasūt iz vītys Latgolā,” prīcojās organizatore.

Aija uzsver, ka pasauļa latgalīšu saīts “Saliduojums bez liduošonys” ir atvārts ikvīnam, ari interesentim, kas dzeivoj Latvejā. Svareigi, lai ir patikšona par latgaliskū i vēļme byut tymā īškā, naatkareigi nu sovys atsarasšonuos vītys.

Dasasaceit ūtrajam pasauļa latgalīšu saītam škārsteiklā īspiejams leidz ituo goda 15. maja 12.00. stuņdem, aizpyldūt veidlopu. Pasuokuma aktualitatem var sekuot leidza ari facebook.com.