Rokstu sagataveja: portals lakuga.lv

Nu 17. leidz 20. augustam bīdreiba “LOBS” organizēja naformaluos apvuiceibys Latgolys jaunīšim “Byut latgalīšam ir stileigi”. Tūs mierkis beja veicynuot lokalpatriotismu, latgaliskuos identitatis styprynuošonu i zynuošonys kulturizgleiteibys jūmā. Apvuiceibys Rēzeknis nūvoda Drycanu pogostā puļcēja 15 jaunīšus na tikai nu Rēzeknis nūvoda, bet ari nu Preiļu i Rēzeknis piļsātu, portalam lakuga.lv atkluoj apvuiceibu organizatore Ingūna Semule.

Pyrmajā apvuiceibu dīnā jaunīši sovstarpeji sasapazyna, veiduoja salīdātu komandu, izmontojūt dažaidys komandu veidojūšuos aktivitatis i grupu dorbus. Dīnys nūslāgumā, izmantojūt sītspīdis drukys tehniku, daleibnīki apdrukuoja sev t-kraklus ar Latgolā pazeistamuo muokslinīka Raibuo veiduotū dizainu. Tys ļuove jaunīšim vaira īpazeit muokslinīka dorbus i latgalīšu volūdu.

Sovukuort ūtrajā dīnā jaunīši devēs izbraukumā pi Rāznys, kab puorvarātu škieršļu trasi “Rāznas priedes”. Ituo braucīņa mierkis beja paruodeit tū, kai ir īspiejams izmontuot lītdereigi i aktivi sovu breivū laiku tepat Latgolā. Dīnys nūslāgumā vysi jaunīši vērēs filmu “Piļsāta pi upis”, sovukuort nuokušajā dīnā pi jaunīšu gasteja filmys golvonuos lūmys atveiduotuojs Dāvis Suharevskis i postfolklorys grupys “Rikši” dalinīks i raidejuma “Kolnasāta” vadeituojs Ēriks Zeps. Teikūtīs ar Ēriku, apvuiceibu daleibnīki izveiduoja ari sovus radejis raidejumus i uzzynuoja vaira par radejis dorba specifiku. Turpretim Dāvis dalejuos sovūs pīdzeivuojumūs, filmejūtīs filmā “Piļsāta pi upis”. Jaunīšim svareigi beja uzzynuot na viņ lektoru nūsadorbuošonu i pīredzi, nu i tū, kai jī saglobuojuši sovu latgaliskū identitati.

“Jaunīši cīši nūvērtēja tū, ka lektori, īdvasmuotuoji i vīnkuorši aktivi cylvāki ir godūs jauni i tū, ka jūs padūmūs i īsacejumūs ir vārts īsaklauseit,” soka Ingūna Semule.

Apvuiceibu nūslāgumā daleibnīki atzyna, ka grybātu projektu turpynuot i ari nuokušgod pīsadaleitu leidzeiguos apvuiceibuos, kai ari sajēme daudz svareigys informacejis sovu latgaliskūs sakņu styprynuošonai.

Bīdreiba “LOBS” apvuiceibys “Byut latgalīšam ir stileigi” eistynuoja ar Latgolys regiona atteisteibys agenturys, Vaļsts kulturkapitala fonda i A/S Latvijas valsts meži finansialu atbolstu, kai ari ar Rēzeknis nūvoda Izgleiteibys puorvaļdis finansialu atbolstu.