Roksta autors: portals lakuga.lv

Suocūtīs pavasaram, bet vēļ īmyužynojūt zīmys skotus, sadarbeibā ar Ingmāru Zaļmežu topuse vizualuo verseja Džeinys Gavaris dzīsmei “Caur sirdi”, portalam lakuga.lv paviesteja poša dzīsmineica.

Dzīsme “Caur sirdi” ir tūpūšuo dzīšmu albuma, kura izīšona planavuota vosorys vydā, golvonuo aba tituldzīsme. Par dzīsmi muzike soka: “Dzīsme “Caur sirdi” līk nūjaust, ka vyss jau ir par tū, kai mes īsaklausam vīns ūtrā, kai mes eistynuok sajiutam pasauli – tik caur sirdi!” Dzīsmis muzykys i vuordu autore ir Džeina Gavare, dzīsmi aranžiejs dzīsminīks Reinis Jaunais, skaņu režisors Rostislavs Zelikovs.

“Caur sirdi” vizualuos versejis autors ir Ingmārs Zaļmežs, tei topuse Vuorkovā, Preiļūs i Jākubpilī. Taipat muzike soka paļdis juos tārpa muokslineicai Inārai Voitānei i Vuorkovys Nūvodpietnīceibys muzejam par rekvizitim, kas ļuove pīškiert juos dzīsmis tālām senejuokys nūskanis.

Jaunajā dzīsmineicys Džeinys Gavaris albumā byušūt 12 dzīsmis, dorbs pi tūs vēļ turpynojās, bet albums īcarāts kai turpynuojums muzikis pyrmajam albumam “Cylvākam”, kas izguoja 2015. godā. Džeina stuosta: “Jaunais dzīšmu kruojums byus kai pīsaskaršona sirdei, kai klauviejīņs nu vyda, kai sirdsatmiņa par tū aizdavumu, kura deļ mes asam atguojuši degt.”

Dzīsmineica, gleznuotuoja, dzejneica i školuotuoja Džeina Gavare ir nu Vuorkovys nūvoda. Vaira par Džeinu Gavari var izzynuot juos porfilā socialajā teiklā “Facebook” ITE.