Rokstu sagataveja: portals lakuga.lv

Nūsaslāguse 2021. gods sakraluo montuojuma finansiešonys programys dasacejumu izviertiešona. Nu 57 padūtūs projektu vaļsts leidzekļus konservacejai i restauracejai sajims 33 Latvejis dīvnomi. Kūpejuo pīprasejumu summa beja 3,8 miļjoni, bet sadaleits daīmamais finansiejums – 1,01 miļjons eiro, viestej informaceja Nacionaluo kulturys montuojuma puorvaļdis (NKMP) sātyslopā.

“Latvejis lauku i piļsātu godu symtu gaitā izkūptuos kulturvidis naatjamama sastuovdaļa ir bazneicys, kas boguotynoj Latvejis ainovu, kai ari styprynoj regionus gareigi, materiali i emocionali” – ar itaidu pamatuojumu nu 2017. gods suokta Sakraluo montuojuma finansiešonys programa, kurys primarais mierkis ir apdraudātūs dīvnomu materialuos substancis saglobuošona. Atbylstūši Sakraluo montuojuma finansiešonys lykumam, dasacejumus Nacionalajai kulturys montuojuma puorvaļdei padūd religiskuos savīneibys, saryndojūt prioritarā seceibā. Nu programys suokšonys da šam daškierts finansiejums 1 500 000 eiro apmārā 51 objektam vysā Latvejā vysaidu konfeseju pīdereibā asūšim kulturys pīmineklim. Itymā konkursā sadaleiti vēļ 1,01 miļjons eiro, kas paleidz i jau īprīšk atbaļsteitim dīvnomim, i suoc jaunu objektu restauraceju.

Katuoļu arhitekturys montuojuma sadaļā nu Latgolys dīvnomu ilggadejs atbolsts turpynojās izcylajam baroka arhitekturys paraugam – Pasīnis bazneicai, kur 17 000 eiro daškierti fasažu remontam. Tok pādejūs godu aktivitati aplīcynoj dorbi Landskoronā, kur par 15 600 eiro nūtiks bazneicys rītumu pusis zvonu tūrņa jumta, myura i fasadis gluobšona. Bukmuižys bazneicai par 7900 nūvērss jumta bļakys saguma, leita iudiņa nūtaku i nasūšūs kūka konstrukceju avarejis stuovūkli.

Latvejis Pareizticeigūs sinode leluokuos prioritatis redz lauku dīvnomu atjaunuošonā. Nu Latgolys pareizticeigūs dīvnomu 9982 eiro daškierti Aglyunys nūvoda Škeļtovys bazneicys restauracejis projekta dokumentacejis izstruodei, 6500 eiro – Daugovpiļs Sv. Borisa i Gleba bazneicys kupolu remontam, sovutīs 7200 eiro – Daugovpiļs Sv. Nikolaja bazneicys jumta i kupolu remontam. Mozuokū pīšierumu nu vysu pareizticeigūs dīvnomu – 336 eiro – sajims Rēzeknis nūvoda Iļžukolnā, kur jumiks apsekuos i nūviertēs Kuļnevys bazneicys kapleicys jumta stuovūkli.

Staraveru montuojumu puorstuov viņ div lyugšonu nomi Rēzeknis nūvoda Ismerūs i Kampiškūs ar kūpejū finansiejumu 11 200 eiro. Ismeru lyugšonu nomam restaurēs lūgus par 7500 eiro, sovutīs Kampišku lyugšonu nomam nūmaineis elektroinstalaceju par 3700 eiro.

Sakralū montuojumu ituo finansiejuma ramuos primari viertej nu arhitekturys apdraudieteibys vīdūkļa, partū jis var atsaškiert cytūs aspektūs (cik daīmams, draudzis lelums, personalejis i c.). Prioritatis ītekmej ari konfeseju īškejuo politika. Lāmumu pījimšona ar Kulturys ministra reikuojumu uzticāta Sakraluo montuojuma padūmei, kurys mierkis ir veicynuot instituceju sadarbeibu. Juos sastuovā ītylpst NKMP, Kulturys ministrejis i leluokūs konfeseju puorstuovi. I padūme, i dasaceitūs objektu daudzveideiba aplīcynoj, ka sakralais montuojums ir byutisks myusu vaļsts lapnums, kura saglobuošona ir svareiga nacejis identitatei. Cikom sabīdryskuos organizacejis i entuziasti jau sabrukušūs bazneicu apleicīni sovom rūkom sakūp tolkuos i bez moksys, vaļsts ryupejās par materialū atbolstu āku saglobuošonai itai i cytom paaudzem.