Rokstu sagataveja: portals lakuga.lv

“Waze” ir vīna nu popularuokūs navigacejis aplikaceju, kas dūmuota kuļdinīkim i planšetdatorim. Tei ir izveiduota Izraelā i dorbojās jau nu 2008. goda. Itūšaļt “Waze” izmontoj jau vaira nakai 50 miļjoni lītuotuoju, junī tuos lītuotuojus sagaideis ari aplikacejis latgaliskuo verseja.

Izaruoda, ka ideja realizēt latgaliskū “Waze” verseju roduos jau kaidu strēči atpakaļ. “Kod “Waze” pasaruodeja, i pasaruodeja pyrmuo latvīšu volūdys verseja, jau tod beja dūma, ka byutu forši sataiseit ari verseju latgaliski,” stuosta vīns nu idejis autoru Jurs Viļums.

Tyka raudzeits sasazynuot ar “Waze” komandu, tok tei saziņa nabeja eisti sekmeiga. “Voi nu mes namuociejom paskaidruot, cik feina byutu latgalīšu volūda aplikacejā, voi beja kaids cyts īmeslis, nazynu,” atzeist Jurs.

Piec kaida laika tūmār izadeve dūmu par latgaliskū aplikacejis verseju nūdūt tuoļuok. “Suoču struoduot Dagdys nūvoda Turisma informacejis centrā, piec kaida napylna mieneša Dagdā vīnai īlai beja remonts, poši “Waze” administratori papraseja, lai aizsyutu nūruodis, kai remonta vītu apbraukt. Es jim aizsyuteju, i pi reizis pavaicuoju, voi jī var paleidzēt sasazynuot ar storptautyskajim “Waze” administratorim, deļtam ka ir gribiešona sataiseit aplikacejis latgaliskū verseju,” doluos Jurs.

Tyka nūlamts izveiduot na tikai audio nūruodis latgaliski, bet iztulkuot ari vysu programys interfeisu. Jurs stuosta, ka kūpā beja kaidys četrys tyukstūšys vysaidu frāžu i tekstu, kas beja juopuortulkoj. Iz tū aizguoja gondreiž pusgods. “Tod īrakstejom audio, tū pīkryta izdareit Arņs Slobožanins. Tū izdarejom jau pyrma goda. Kaidu laiku beja klusums, bet niu ari audio ir īlykts testa režimā, kaidi 20–30 cylvāki tū itūšaļt testej,” skaidroj Jurs.

“Cerim, ka beigsīs testiešonys režims i junī tū vysu akceptēs, tod kotrys cylvāks varēs sovā kuļdinīkā atrast latgalīšu volūdu gon programys interfeisā, gon ari dzierdēt nūruodis latgaliski,” cereigi stuosta Jurs.

Kai skaidroj Jurs, tod motivaceja struoduot pi “Waze” latgaliskuos versejis beja viņ plyks entuziasms. “Redzieju tū kai īguļdejumu turismā, tei byutu feina līta na tikai lītuotuojim, bet arī ceļuotuojim, kas iz Latgolu atbrauc.”

Pi aplikacejis latgaliskuos versejis pamatā struoduoja pats J. Viļums, tū eistynuot paleidzēja Sergejs Čakāns, ari vīns nu “Waze” latvīšu administratoru. “Pyrma audio versejis īraksteišonys frāzis puorsavieršonai syuteju gon Edeitei Husarei, gon Marutai Latkovskai,” stuosta Jurs.

Navigacejis aplikaceju “Waze” var dabuot gon “Play Store”, kas dūmuots “Android” lītuotuojim, gon ari “App store” iOS lītuotuojim.