Sagataveja: portals lakuga.lv

Par gūdu latgalīšu politiskuos, kulturys i sabīdryskuos darbineicys Valerejis Seilis (1891–1970) 130. jubilejai, itūgod Rēzeknē plānuotys vairuokys aktivitatis, tūstorp teik izsludynuots Valerejis Seilis bolvys konkurss, kurā aicynoj īsnēgt dorbus nūvodpietnīceibā, informej Rēzeknis piļsātys dūmis Komunikacejis nūdalis vadeituojs Kārlis Pozņakovs.

V. Seilis bolva ir Rēzeknis piļsātys dūmis apbolvuojums nūvodpietnīceibā gon par veiksmeigi eistynuotim pietnīciskim dorbim, gon organizātim pasuokumim Rēzeknis piļsātā voi Rēzeknis nūvodā. Konkurss nūtiks vīnu reizi div godūs i juo kūpejais bolvu fonds ir 1000 eiro, jū varēs sadaleit storp vairuokim pretendentim, kurus izalaseis speciali izveiduota žureja. Kandidatus var dasaceit juridiskys personys, pylngadeigys fiziskys personys, kai ari pretendents var dasasaceit pats. Nūvodpietnīceibys dorbam juobyun eistynuotam pādejūs diveju godu laikā.

Bolvys daškieršonys golvonais mierkis ir veicynuot Rēzeknis piļsātys i Rēzeknis nūvoda biblioteku, izgleiteibys īstuožu, nūvodpietnīku, muzeju i arhivu (izjamūt pošvaļdeibu i vaļsts muzejus i arhivus) interesi i aktivitati Latgolys kulturviesturiskā montuojuma apgiušonā, saglobuošonā, populariziešonā i daīmameibā, kai ari paust atzineibu veiksmeiguokajim nūvodpietnīceibā veiktūs dorbu autorim i eistynuotuojim.

Īsnīdzamī dokumenti/materiali ir dasacejums ar juo dalykumim adresāts organizātuojim (dalykums nr.1), dokumentu pakete ir numurāta i cauršyuta. Vairuok par dasacejuma nūformiešonu var īsapazeit ITE. Bolvys kandidati sovus pieteikumus īsnādz leidz konkursa nūtikšonys goda 1. oktobram personeigi Rēzeknis piļsātys pošvaļdeibys agenturys “Rēzeknes Kultūras un Tūrisma centrs” 349. kabinetā, Piļs īlā 4, Rēzeknē, dorba dīnuos nu pļkst. 8.00 da 16.30, ci, syutūt iz e-posta adresi kultur@rezekne.lv, parokstūt ar drūšu elektroniskū parokstu.

1918.–1920. godā V. Seile struoduoja par Rēzeknis apriņča školu inspektori, nu 1923. da 1940. gods beja Daugovpiļs Vaļsts školuotuoju instituta dybynuotuoja i direktore, vāluok – krīvu volūdys školuotuoja Rēzeknis vaļsts ekonomiskajā tehnikumā, viesturis školuotuoja Rēzeknis Vaļsts školuotuoju institutā i Rēzeknis latvīšu vydsškolā. Piec tam struoduoja Reigā, kur pavadeja ari myuža nūgali. Paglobuota Daugovpiļs Katuoļu kopūs. Rēzeknē ir V. Seilis īla, kurys 38. ākā jei dzeivuoja.

Pīmynūt V. Seili, da 4. juļa Latgolys Kulturviesturis muzejs pīduovoj tematisku izstuodi “Politiķei, pedagoģei un sabiedriskajai darbiniecei Valerijai Seilei 130”, kuramā var sajust laiku, kod dzeivuoja i dorbuojuos izcyluo latgalīte, kai ari īsapazeit ar juos davumu i pamastū kulturviesturiskū montuojumu. Cikom muzejs vēļ slāgts apmaklātuojim, teik pīduovuota izstuodis virtualuo verseja. Savutīs Rēzeknis Centraluo biblioteka pīduovoj virtualū izstuodi, kura byus apsaverama bibliotekys sātyslopā. Jamā byus apkūpuota biografiskuo i bibliografiskuo informaceja nu bibliotekys elektroniskuo kataloga, nūvodpietnīceibys datu bāzis i elektroniskajim resursim.

Latgolys Kultūrvēstures muzeja veiduotū videostuostu “Politiķei, pedagoģei un sabiedriskajai darbiniecei V. Seilei 130”, kas pyrmizruodi pīdzeivuoja ituo gods Muzeju naktī, var nūsavert ite:

Juodasoka, ka īprīkšejais Rēzeknis piļsātys dūmis apbolvuojums, kasgadejuo Valerejis Seilis bolva, beja biblioteku darbeibys jūmā. Nu 2003. gods da 2008. gods tū padeve bibliotekom par izcylu veikumu Latgolys kulturviesturiskuo montuojuma saglobuošonā i populariziešonā bārnu i jaunīšu vydā. Sovutīs Daugovpiļs Universitatē padūd Valerejis Seilis premeju.