Rokstu sagataveja: portals lakuga.lv

Namaineiga Rogovkā ir tradiceja 29. junī svieteit Pīterdīnu, kod nautrānīši gūdynoj dzejnīku Pīteri Jurciņu. Ir bejuši koncerti, vakariešona pi guņskura, pogostu amatermuokslys kolektivu uzastuošonys i citys aktivitatis, bet namaineigs ir pīminis breids Desetnīku kopūs – 19.00 stuņdēs, informej Nautrānu sporta hallis-kulturys noma vadeituoja Inga Vigule.

Itūgod Pīterdīna 20.00 stuņdēs nūtiks tīšraidē nu Rogovkys centra, nalobvieleigu laika apstuokļu gadejumā – nu Nautrānu sporta hallis-KN (vērtīs Nautrānu sporta hallis-KN “Facebook.com” kontā). Varēsim baudeit koncertu, kurā ar sovom dzīsmem prīcynuos Sovvaļnīks, taipat debitēs Arņs Slobožanins ar grupu “PusKapļi”. Jis par “PusKapļim” stuosta: “Nu grupys “Kapļi” ir palykuse tikai puse – es, Jurs i Rasma, bet ūtrei puse, īskaitūt vokalistu, ir pasamainejuse. Vysaiduoku dzeivis pagrīzīņu rezultatā “Kapļus” ir nūliems atstuot Oskars (Raibīs), praktiski jau jis beja tys golvonais “mesidža” nesiejs, kai pats soka – cylvāks ar mikrofonu. Mes sarunuojom, ka grupa dreikst izpiļdeit juo dzīduotuos dzīsmis, bet tagad tū dareis Margarita Kolosova, tik vajadzeigs grupai cyts nūsaukums. Tai kai nu suokūtnejuos grupys mes palykom puse, tod tagad sauksimēs “PusKapļi”. Kod mes īsadūmuojam par Margaritu kai solisti, mes saprotom, ka jei tai “kapleigi” tū vysu izdareis. Pyrmais koncerts tagad byus Rogovkā, par kū vysi asam cīši, cīši prīceigi i saviļņuoti.”

Koncerta laikā nūtiks ari P. Jurciņa pīmiņai veļteitais Jaunūs literatu konkursa nūslāgums. Itūgod konkursa moto ir Pītera Jurciņa vuordi: “Tu tymsumam par speiti nes sovu gaismekleiti.”  Konkursa dorbu īsniegšonys laiks tyka pagarynuots leidz 20. juņam.

Pasuokums nūtiks ar SIA “Latvijas Valsts meži” i Vaļsts kulturkapitala fonda Latgolys kulturys programys finansialu atbolstu.