Rokstu sagataveja: portals lakuga.lv

6. i 7. augustā Modūnis nūvoda Borkovā nūtiks XX Tautys muzykantu svātki, kur muzicēs i Latvejis nūvodu muzykanti-vacmeistari, i kapelys i folklorys kūpys. Taipat ir izveiduota jubilejis izstuode “Tautas muzikantu svētkiem – 20”, kas pasuokumu laikā byus apsaverama breivdobys estradē i Borkovys kulturys nomā, informej Tautys muzykantu bīdreibys puorstuove Maija Upeniece.

XX Tautys muzykantu svātki īsaskanēs jau pīktdīnis vokorā, 6. augustā 19.00 stuņdēs Borkovys breivdobys estradē īskaņu koncertā muzicēs kapelys i individualī muzykanti. Sastdiņ, 7. augustā, 13.00–15.30 stuņdēs Borkovys centrā varēs izbaudeit īlu muziciešonu i teikšonūs ar muzykys instrumentim, piec tam 16.00–18.00 stuņdēs Sporta stadionā skanēs leijerkastnīka Gata Grīnberga muzyka i saimis varēs pīsadaleit vairuokuos aktivitatēs, bet svātku kulminaceja atsabolsuos Borkovys breivdobys estradē, kur 19.00 stuņdēs skanēs svātku dyžais koncerts.

Radzamuokī Latgolys puorstuovi Borkovā itūgod byus gon individualī muzykanti: Nikolajs Zaharovs i Aņss Ataols Bierzeņš (Reiga), Juoņs Gipters (Daugovpiļs nūvoda Vabale), Pīters Belinskis (Rēzeknis nūvoda Rogovka), Voldemārs Džigurs (Bolvi), Daiņs Ločmelis (Ludzys nūvoda Saļņova); gon muzykantu grupys: kapela “Sveicynojam, vielejam!” (Ludzys nūvoda Saļņova), folklorys kūpa “Olūts” (Bolvu nūvoda Veiksna), kapela “Bumburneicys” (Viļāni).

Tautys muzykantu bīdreibys vadeituoja i itūs svātku īdybynuotuoja Iveta Dukaļska soka: “Tī ir vysys Latvejis svātki, bet vysod vysvairuok itymūs svātkūs pīsadalejuši muzykanti nu Latgolys. Sātys muziciešonys tradiceja Latgolā augšuok turāta kai cytūs nūvodūs. Maņ redzīs, tys atsatīc na viņ iz muzyku, bet ari cytom tradicejom. Latgolā apsazynoj sovu vierteibu caur tradiceju.

Pats pyrmais itaids pasuokums, kod suoču vuokt tautys muzykantus, vēļ rajona leiminī nūtyka munā dzymtajā Ludzys nūvoda Pušmucovā. Taidi vītejī pasuokumi ari nūsaturiejuši Pušmucovā, Augšdaugovys nūvoda Vabalē, Kūrzemē – Saldus nūvoda Lutriņūs. Poša beju Borkovā i partū itī svātki suocēs Borkovā 2001. godā i tai leidz 2007. godam, tod leidz 2018. godam Viļānūs, bet viļānīši cīš aktivi brauce iz Borkovu i Viļānūs reikuoja paralelus koncertus, cikom poši svātki vēļ nūtyka Borkovā. 2019. godā svātki nanūtyka, pārņ svātkus atpakaļ pajēme Borkova.  

Svātki tyka radeiti individualajim muzykantim, kas spēlej sātā. Tī muzykanti, ar kū suocem itūs svātkus, beja eisti teirradni. Kaidi atguoja nu sātys, taidi spēlēja. Jim nabeja skotuvis pīredzis, repertuars kai sātā – tai pyrmūs desmit godus. Myusu pyrmī desmit godi beja izteikti baļsteiti sātys muziciešonys tradicejā. Šudiņ jī ir par vacu voi ari jūs nav.

Itei dalinīku paaudze, kam tān ap 50 i vairuok, jau pīroduši pi skotuvis, izprūt repertuaru i atguojušū publiku, spēlej tū, kas tautai pateik. Tān sasarodušys kapelys. Kod dominej kapelys, suonim palīk individualī muzykanti. Itūgod otkon, laikam sakarā ar Covid-19, vairuok pīsadola individualī muzykanti. Praseitūs vēļ vīns braucīņs pa Latveju izpieteit, kas nūtics ar sātys muziciešonu. Voi teišom vysi saguojuši kapeluos?

Ka turpynuosīs Covid-19 laiks, atsagrīzs muziciešona sātā. Kai mozajuos večerinkuos – vīna sāta aizīs da ūtrys sātys. Vysaida veida digitalizaceja i tehnologeju izmontuošona maitoj itū tradiceju. Agruok aizguoja vīns pi ūtra cīmā, nūsaklauseja gobolu, tod, pi seve spālādams, izdūmuoja sovu variantu. Tān, ūtru klauseidamīs, īroksta telefonā i sātā nūspēlej taišni taipat. Nikaidi varianti nasarūn. Maņ ir bažys, voi svātki varēs turpynuotīs, kod aizīs tānejuo paaudze. Godūs cīš jaunu muzykantu nav, brauc tik veiri i sīvys jau godūs.”