Rokstu sagataveja: portals lakuga.lv

Viļānu piļsātys bibliotekā da 27. augusta apsaverama muokslineicys Maijis Podniekys speciali žurnalam “Katōļu Dzeive” (1926–1940, 1989–2014) zeimātūs ilustraceju izstuode, viestej  Rēzeknis nūvoda Viļānu sātyslopa.

Par itū sadarbeibu godu garumā atjaunuotuo žurnala “Katōļu Dzeive” redaktore Maruta Latkovska soka: “Latgalīšu rakstneicys Naaizmierstulis stuostu gruomotys “Dīva duorza pučeitis” īspaidā myusu žurnalā beja izveiduota taida poša nūsaukuma rubrika bārnim, kurā tyka publicāti stuosteni i dzejūleiši. Golvonuos itūs dorbu autoris beja školuotuoja Valentina Celeitāne nu Ezernīku i Veronika Teņča-Goldmane nu Kuldīgys.

16 godu garumā stuosteņu bārnim ilustratore myusu žurnalā beja muokslineica Maija Podnieka. Ituos myusu breineiguos sadarbeibys rezultatā ir topuši sirsneigī zeimiejumi, kuri niu radzami ari itamā izstuodē.”

Muokslineica Maija Pūdnīka pībylst: “Zeimiejumi izstuodej tyka atlaseiti, lai paruodātu itūs 16 godu laika pūsmu nu suokuma leidz beigom, nu kotra goda ir kas pajimts. Nav tai, ka vierūs, kurs zeimiejums smukuoks voi lobuok pasadevs. Tei sadarbeiba saguoja godu garumā, a Maruta vīnai reizei papraseja izzeimēt. Nazkai tai īsasuoce i aizguoja…”