Pādejūs godu laikā dzymtys viesturis pietnīkim ir pasaruodejušs leluokys īspiejis apzynuot sovus radu rokstus i sataiseit sovys dzymtys kūku. Pyrma dažim godim Latvejis Vaļsts viesturis arhivs suoce projektu “Raduraksti”. Tuo ideja ir paplašynuot dokumentaluo montuojuma pīejameibu, lai veicynuotu dzeivuotuoju identitatis i dzymtu viesturis pietnīceibys īspiejis, kai ari kab saglobuotu dokumentu originālus, izstruodojūt myusudīneigu dokumentu drūšeibys i llītuošonys fondu. Jau vairuokus godus pīejama virtuala arhiva laseitova. Interesenti bez moksys var pieteit sovys dzymtys viesturi, lītojūt škārsteiklu. Jiusim tikai juosaregistrej: http://www.lvva-raduraksti.lv i juoattaisa interesejūšuo sadaļa.
Niule “Raduraksti” publiciejuši Latvejis ļuteru, Rima katuoļu, pareizticeigūs, baptistu, reformatu, uniatu, vacticeibnīku i Mozus ticeigūs metriku gruomotys da 1905. godam, 1897. goda 1.Vyskrīvejis tautys skaiteišonys dokumenti (dzeivuotuoju saroksti). Suokta ari dvieseļu revizeju sarokstu īlikšona.
Publiskai izskanejuse informaceja līcynoj, ka ekonomiskuos krizes deļ ari arhivim ir samozynuots finansejums i digitalizacejis dorbi nasavyrza iz prīšku tik dreiž, kai daudzeji interesenti grybātu. Deļtuo dūmubīdru grupa, atsaļstejūt tikai iz sovu entuziasmu, niule, lītojūt projekta “Raduraksti” pīeimamūs materialus, ir suokuse apkūpuot īrokstus pa draudzem. Dorba aisdavums – ne tikai veicynuot sovys dzymtys izpieteišonu, bet sabīdriskā kuortā apkūpuot kotram vierteigu informaceju par konkretajā draudzē dzymušajim, kas byus sakuortuota kai piec uzvuorda, tai ari piec dzimšonys goda. Informaceja teik veiduota Excel formatā i pa druskai teik publicāta ite: http://www.ciltskoki.lv. Vairuok par itū ideji var skaiteit portala draugiem.lv, dūmubīdru grupā “Ciltskoka veidošana – dzimtas sakņu meklēšana”.
Vysys ituos aktivitatis ir breivpruoteigys i nūteik bez finansiala atspaida, bet tī, kam itaidys lītys interesej, aicynuoti dasavīnuot. Niule teik apkūpuotys zinis par daudzejom Latvejis draudzem, Dīvamžāļ vysmozuokuo atsauceiba ir nu Latgolys. Juoatzeimej, ka dorbs nav pavysam prosts, īroksti bazneicu gruomotuos ir vuocu, krīvu voi poļaku, bet vacuokajuos – i latiņu volūdā, ari rūkroksti na vysod saskaitami. Tak, drusku “pīsašaunūt” , tei līta aizīt, daļ tam ka metriku īroksti ir veiduoti piec vīnaidys shemys. Na vysom draudzem ir sasaglobuojuš vysi īroksti – kaidu godu var datryukt. Vacuokī īroksti ir nu 17. gs. ūtruos puses.
P. S. Ka ir kaidys naskaidreibys voi vaicuojumi, var raksteit iz e-postu: apinis333@inbox.lv. (Pats struodoju ar Latgolys draudzem, niule vyspylnuokuos zinis ir par Bieršgali (Rēzeknis nūvods), bet papieteitys ari cytys Rēzeknis, Ludzys, Nautrānu, Stiglovys bazneicu gruomotys).

Sagataveja: Juoņs Apīnis