Rokstu sagataveja: portals lakuga.lv

Saskaņā ar Vaļsts prezidenta Egila Levita i Ordiņu kapitula 2021. gods 22. oktobra lāmumu pīškierti 60 augstuokī Latvejis vaļsts apbolvuojumi. Treju Zvaigžņu ordiņs pīškierts 33 personeibom, Vīstura ordiņs – 11 personeibom i Atzineibys krysts – 16 personeibom, viestej Vaļsts prezidenta sātyslopa.

Augstuokūs Latvejis vaļsts apbolvuojumus sajam cylvāki, kuri izcyli kolpuojuši Latvejis vaļstei i tautai i kuru pošaizlīdzeigais, profesionalais i sabīdryskais dorbs, pylsūniskais veikums ir peļnejs augstuokū vaļsts atzineibu. Kotra atseviškais dorbs i īguļdejums ir vīnleidz izcyli viertejams i cyldynojams.

Par Treju Zvaigžņu ordiņa komanderi īcalts Dailis teatra muokslinīciskais direktors, teatra, kinys i operys režisors Vīsturs Kairišs.

Par Treju Zvaigžņu ordiņa viersnīkim īcalti scenografe i kostimu muokslineica, glaznuotuoja Ieva Jurjāne, demografs, Storptautyskuos Migracejis organizacejis puorstuovnīceibys Latvejā vadeituojs Dr. hist. Ilmārs Mežs, sabīdryskais darbinīks, 1991. gods barikažu daleibnīks Jānis Pudāns, Latvejis Universitatis Literaturys, folklorys i muokslys instituta latvīšu tautysdzīšmu semantikys pietneica Dr. habil. philol. Beatrise Reidzāne.

Par Treju Zvaigžņu ordiņa kavaleri īcalta dzīduotuoja, dirigente i muzykys pedagoge Aija Kukule.

Par Atzineibys krysta komanderi īcalta arhitekte, profesionaluos izgleiteibys kompetencis centra “Daugavpils Dizaina un mākslas vidusskola “Saules skola”” direktore Inguna Kokina. Par Atzineibys krysta kavaleri īcalts ilggadejais Bolvu nūvoda sporta školu školuotuojs i sporta treners Ulriks Pozņaks.