Rokstu sagataveja: portals lakuga.lv

Kulturys ministreja (KM) aicynoj dasaceit apbolvuojumam bārnus i jaunīšus vacumā nu 10 da 25 godu, kurī 2021. godā dabuojuši nūzeimeigus sasnāgumus storptautyskūs konkursūs, skatēs i izstuodēs, ari jūs školuotuojus, informej Latvejis Nacionaluo kulturys centra Sabīdryskūs attīceibu specialiste Linda Ertmane.

Ar augstuokū apbolvuojumu kulturizgleiteibys nūzarē – KM apbolvuojumu – teik nūvārtāti Latvejis bārnu i jaunīšu sasnāgumi storptautyskūs konkursūs, izstuodēs i skatēs īprīškejā kalendarajā godā muokslys i dizaina, muzykys i dejis nūzarēs. Apbolvuojuma pretendenti ir ari pedagogi i koncertmeistari, kurī gatavejuši bārnus i jaunīšus storptautyskajim konkursim, izstuodem i skatem, kuramuos īgiutys gūdolguotys vītys.

KM apbolvuojums teik padūts sevkuru godu kūpš 1998. goda. Apbolvuojuma pīškieršonu nūdrūsynoj Latvejis Nacionalais kulturys centrs.

Dasacejumus apbolvuojumam pījims da ituogods 4. marta. Jī juopadūd Latvejis Nacionalais kulturys centrā kluotīnē, syuteiti pa postu (Pils laukumā 4, Rīgā, LV-1050) ci elektroniski paraksteiti, iz LNKC elektroniskuo posta adresi lnkc@lnkc.gov.lv (ar nūruodi KM Bolvys konkursam). KM apbolvuojuma nūlykums i dasacejumu anketys atrūnamys KM škārsteikla vītnē ITE.

Ituo apbolvuojuma padūšonys pasuokums i laureatu izziņuošona plānuota 2022. gods majā reizē ar Latvejis Nacionaluo kulturys centra īdybynuotuos Cimzis bolvys nūtikšonom. Reagejūt iz maineigū epidemiologiskū situaceju vaļstī, pasuokuma nūtikšonys formats var tikt puormeits.