Rokstu sagataveja: portals lakuga.lv

Pādejūs godu vīna nu aktivuokūs i veiksmeiguokūs latgalīšu muziķu ir repere Ūga. Ituo gods suokums darbeiguma ziņā Ūgai ari nav izjāmums – publicāts svaigs pošys dorbs “Nalegalais bizness” i aizsuoktys jaunys sadarbeibys ar dzīsmem i gaidomim koncertim.

Nalegalais bizness

Janvara ūtrā pusē publiskuošonu pīdzeivuojs jauns Ūgys dorbs – dzīsme “Nalegalais bizness”, kuruos muzykys autors ir Jezups, bet dzīsme īraksteita Upītē, “Bigmaar’s Records studejā”. Ūga portalam lakuga.lv stuosta, ka skaņdorbs rodīs piec sasatikšonys ar kaidu cylvāku, kurs bejs cīši impulsivs i uzstuojeigs. “Taišni taids, kaidi mums, sīvītem, i pateik,” atsazeist Ūga aba eistajā vuordā Daiga Barkāne. “Itys mani īdvesmuoja uzraksteit dzīsmi par tū, kaida varātu byut dzeive iz prīšku taišni kūpā ar itaidu spylgtu personažu. Saprūtams, ka, kab klauseituojim byutu interesantuoka klauseišonuos, kū ta “pīpuškuoju” kluotyn.” Ūga soka, ka leidza ar tū “Nalegalais bizness” saguojs kai kinu sižeta cīneigs gobols, kas baļsteits patīsuos nūtikšonuos. Latgalīšu repere atkluoj, ka itam gobolam byus ari ūtrei daļa ar nūsaukumu “Biedeigais B”, kur B teikūt atšifrāts kai bandits.

Dēmoni

Tikū izguojs muzykys producenta Thomas Haze (eistajā vuordā Tomass Beķeris) albums “Grēku Panti”, kurymā apkūpuotys 12 kompozicejis i pīsadalejuši 11 dažaidi muokslinīki. Tūs vydā ari latgalīšu repere Ūga, kurai dzīsme “Dēmoni”, kas dzierdama albumā, ir pyrmuo sadarbeiba ar producentu. Ūga stuosta: “Par bītmeikeri Thomas Haze pyrma tuo nabeju nikuo dzierdiejuse, bet, kod jis mani uzrunuoja pīsadaleit albumā, pīkrytu, jo beja īspieja poša izavēlēt bītu.” Albumā īkļautuos dzīsmis “Dēmoni”, kurys vuordu autore ir Ūga, bīts jū asūt uzrunuojs jau nu pyrmuos atskaņuošonys reizis. “Pošai pateik itys gobols, tymā asu pamatuse vysys sovys emocejis, kas saisteitys ar na cīši pateikamim nūtykumim munā dzeivē. Dūdu sev vēļ vīnu šansu, syudzu grākus i poša sev i atlaižu – tai tys skaņ,” par dzīsmi stuosta Ūga.

Sūpluok Ūgai albumā “Grēku Panti” pīsadalejuši ari taidi izpiļdeituoji kai BDM, xrobertsl, Sandis, Svēte i cyti. “Tai kai maņ cīši pateikams i estetiski baudoms ruodīs tymss i smogs skaniejums, tod itymā albumā es gribieju apsavērt cylvāka uzvedeibys tymsū pusi. Nabeidzamys atkuopis nu sabīdreibys normu, likumpuorkuopumi, apreibynūšūs vīlu lītuošona, skaudeiba, mali, egomaneja, īkuore. Kab ari nagativys, vys tik tuos ir lītys, kū sabīdreiba pīkūpa arviņ vaira. Taipat gribieju eksperimentēt ar skaniejumu, dzīšmu formom, tai, kab interesanti byutu kai maņ, tai i muokslinīkim, ar kurim kūpā struoduoju. Itymā albumā gribieju dūt vareibu ari mozuok zynomim izpiļdeituojim augt kūpā ar mani,” tai par sovu albumu stuosta producents Thomas Haze.

Arturs Skutelis i “Jā”

Februara suokumā sovu lelkoncertu “Jā” izsludynuoja Arturs Skutelis, kurs ir vīns nu zynomuokūs i sovpateiguokūs latvīšu hiphopa muziķu i tekstu autoru, studejis i rodūšuos apvīneibys PKI dybynuotuojs, dzeivuos muzykys grupys “Tvērumi” līders. Breineiguo viests sūpluok pošam koncertam, kurs īcarāts ituo gods 20. majā koncertzalē “Palladium” Reigā, ir ari Ūgys pīsadaleišona koncertā. Ūga stuosta, ka Arturam Skuteļam pavasarī izīs albums i jai ar cīši lelu prīcu gribīs pasalīleit, ka ari itymā albumā jai i Arturam byus vīns kūpdorbs. “Pats interesantuokais ir tys, ka eisti nazynu, kaids byus myusu sadarbeibys dzīsmis golarezultats, jo Skutelis vysu procesu da pošys pādejuos šaļts tur nūslāpumā. Leidza ar tū ari maņ tei byus pyrmizruode, kurū gaidu ar cīši lelu napacīteibu.”

Majā paradzātajā koncertā “Jā” Arturs Skutelis izpiļdeis kai jaunuo albuma “Jā” dorbus, tai ari dzīsmis nu jaunuoku i senejuoku laiku, bet leluo koncerta eipašūs gostu vydā, kurī uzastuos ar sovom soloprogramom, byus i Ūga. Koncerta beletus var nūpierkt ITE.

Nūstuošona i īšona iz prīšku

Pārnejuo gods suokums Ūgai īsasuoce ar atzineibu vairuokuos goda bolvuos – sajimta kai Latgalīšu kulturys goda bolva “Boņuks”, tai i Muzykys īrokstu goda bolva “Zelta mikrofons” par spylgtuokū debeju Latvejis muzykā. Atsokūt iz vaicuojumu, voi bolvys i atzineiba kū pamainejuse reperis dzeivē, Ūga stuosta, ka nedeļu piec “Zelta mikrofona” jū nūtrīce mašyna i tys lics iz laiku nūstuot – naīspieja i padūmuot, voi bolvys kū ta maina, puormainis izdareja nagadejums. Atsaveseļuošonys process saguojs vysā gars, nu tys bejs ari lobs laiks, kab nūstuotu i padūmuotu, kū tuoļuok, kas pošai ir svareigs. Koč ari bejs juoatsasoka nu vairuoku lobu pīduovuojumu, tok Ūgai niu ruodīs, ka vysam tai i vajadziejs byut, pīspīdu nūstuošonā daudzi saprasts. Bet itūgod repere sūlej vēļ jaunys sadarbeibys, nu reizē i nūsmej, ka ar Ūgu kai ar bitem – nikod nikuo navarūt zynuot, juobyun mūdrim i juogaidūt puorsteigumi!