Rokstu sagataveja: portals lakuga.lv

Dasacejums “Daugavpils 2027” izziņuojs div jaunys nūtikšonys: tīšsaistis pasuokumu “Jaunais Eiropas Bauhaus un mūsu padomju mantojums”, kas nūtiks 22. februarī nu 16.00 da 17.00 “Zoom” platformā, kai ari konkursu fotografim nu vysa pasauļa “LINGUA FRANCA/ DAUGAVPILS”.

Pasuokums “Jaunais Eiropas Bauhaus un mūsu padomju mantojums”

Pasuokums “Jaunais Eiropas Bauhaus un mūsu padomju mantojums” nūtiks 22. februarī nu 16.00 da 17.00 stuņdem “Zoom” tīšsaistē, informej “Daugavpils 2027” puorstuove Jelena Dedele.

Jaunais Eiropys Bauhaus ir radūša iniciativa, kas nūjauc rūbežus storp zynuotni i tehnologejom, muokslu, kulturu i socialū īkļaušonu, i ar dizaina paleidzeibu meklej rysynuojumus kasdīnys problemom. Tys ir vidis, ekonomikys i kulturys projekts, kuruo mierkis ir atbaļsteit Eiropys zaļū kursu, apvīnojūt dizainu, ilgtspieju, daīmameibu vidis i izmoksu ziņā i investicejis. Veicynuot kūpeibu ar muokslys paleidzeibu – taida ir Bauhaus golvonuo ideja.

Bauhaus pamati ir 20. godu symta 20. godūs. Suokumā tei beja arhitekturys, muokslys i ryupnīceibys škola, kas īzeimuoja vysa 20. godu symta arhitekturys i dizaina pamatprincipus. Austrumeiropā Bauhaus principus aizstuoja padūmu modernisms, “hruščovkys” i tipveida guļamrajoni. Padūmu montuojums ir naatjemama myusdīneigys Latvejis piļsātvidis daļa – ap 70 % nu vysu āku tyka izcaltys nu 1946. da 1990. goda. Kūpumā Austrumeiropā itūšaļt ap 50 % dzeivuotuoju dzeivoj itymā laikā caltuos sātuos, i dzeivis kvalitatis, daīmameibys, dizaina i vidis uzlobuošona ir aktuals izaicynuojums Latgolai, Latvejai i leluokajai Eiropys daļai.

Pasuokumā pīsadaleis eksperti: Ieva Zībārte, New European Bauhaus kontaktpunkta vadeituoja Latvejis Arhitektu savīneibā,  kura pastuosteis par Jaunuo Eiropys Bauhaus principim, i Mārtiņš Eņģelis, piļsātvidis pietnīks i turisma kritikis, raidejuma “Ielas garumā” veiduotuojs, vīns nu Daugavpils 2027 dasacejuma kulturys i muokslys programys kuratorim, kurs dūs prīškstotu par principim, kas tīcās iz ilgtspiejeigu i dasalāguot spiejeigu Eiropys piļsātu – vīdpiļsātys, vītrade, nullis emisejis, satiksmis mīrynuošona, kulturplanavuošona i cytim.

Nūslāgumā paradzāta diskuseja i atbiļdiešona iz dalinīku aizdūtajim vaicuojumim.

Registraceja pasuokumam: ej.uz/d27bauhaus

Konkurss fotografim nu vysa pasauļa “LINGUA FRANCA/ DAUGAVPILS”.

Daugovpiļs sadarbeibā ar Rēzekni i vysu Latgolys regionu gatavej dasacejumu daleibai konkursa “Eiropas kultūras galvaspilsēta 2027” finala kuortā. Dasacejuma tema ir “Lingua Franca” – kūpeiga volūda. Dasacejuma izstruodis komandys mierkis ir mudynuot vītejū kūpīnu īsasaisteit dialogā i meklēt, radeit i runuot kūpeigu volūdu, izmontojūt muokslu, kulturu, socialū i komunikativū puorveidi. Mierkis ir na tik paruodeit sasnāgumus i pozitivuos pusis, tok ari aktivizēt sabīdreibu rast kūpeigus rysynuojumus vītejim i globalajim izaicynuojumim. Napīcīšameiba puordūmuot i izrunuot nūklusātū, viesturiskuos traumys i stigmatizaceja mudynoj meklēt puormaiņu, kontrastu i sarunys atspīgeļuojumu fotografejā. Partū ka taišni muoksla i kultura ir tuos, kas var radeit dialogu pozitivom puormaiņom i puorveiduot regiona kulturys ainovu.

Fotografi nu vysa pasauļa teik aicynuoyti byut par “Daugavpils 2027” leidzradeituojim i paruodeit Latgolys daudzveideibu – Daugovpiļs kontrastus, viesturi i cylvākus, kai ari – regionu nu sovys perspektivys. Fotografejis tiks izmontuotys “Daugavpils 2027” dasacejuma vizualajā nūformiejumā, kai ari komunikacejis materialūs, nūruodūt autoru.

Konkursā var pīsadaleit profesionalī i amaterfotografi nu sevkurys vaļsts. Fotografejā juobyut atspīgeļuotai Daugovpiļs voi Latgolys ainovai, cylvākim, nūtikšonom. Dasaceit var sevkuru fotografeju, kas uzjimta na agruok par 2000. goda 1. janvari.

Kab dasasaceitu, ir juoaizpylda dasacejuma forma: ej.uz/linguafranca

Īsnēgt dasacejumu kūpā ar fotografejom (izškiertspieja min 300 dpi, vālams 2000×3000 px) ir īspiejams da 2022. goda 1. marta plkst. 23.59. Fotografejis var davīnuot anketai ar saiti iz failiem.lv / Wetransfer voi cytu muokuļsistemu. Īsnēgt var naīrūbežuotu karteņu skaitu.