Daugovpilī prezentēs Daiņa Īvāna gruomotu par muokslineicu Silvu Linarti
Rokstu sagataveja: portals lakuga.lv
1. martā 13.00 stuņdēs Daugovpilī, Vīneibys noma Mozajā zalē (īīšonā nu Reigys īlys) nūtiks Daiņa Īvāna gruomotys “Silva Linarte 21. gadsimta ainavā” attaiseišonys svātki, informej Vīneibys noma puorstuove Diāna Breidaka.
2021. goda izskaņā Daugovpiļs Vīneibys noms realizēja eipašu projektu, sagatavejūt i izdūdūt gruomotu par vīnu nu izcyluokūs Daugovpiļs i Latgolys 20. godu symta ūtruos pusis i 21. godu symta suoku gleznuotuoju Silvu Linarti.
Nu 2018. goda vosorys par Silvu Linarti dīvamžāļ juorunoj paguotnis formā, tok juos pamastais rodūšais montuojums ir muokslineicys turpynuojums. Prūtams, vyslobuok īpazeit Silvu Linarti var, verūtīs juos gleznuos, tok tikpat vīgli i gaiseigi kai juos ūtys trīpīni beja Silvys stuosti par dzeivis puorbaudejumim. Skorbais muokslineicys liktiņs, kurā īraksteits divreiz māruotais ceļš iz Sibireju, tyvynīku zaudiejums, cylvāku i dobys izlyktī puorbaudejumi, juos dzeivis stuostā mejās ar naparostu dzeivuotgrybu, latgaliskū speitu, atbiļdeibu i sirsneibu. Lakoniskajā, kai ruodīs, trauslajā gleznīceibys manīrē radeituos dobys ainovys, atmiņu fragmenti voi muokslinīciskī viestejumi atkluoj muokslineicys niansātū pasauļa uztveri i tuos profesionalū tāluojumu. Kai muokslineicys rodūšais veikums, tai ar tū nasaraunami saisteitais dzeivis stuosts ir nūzeimeiga Latvejis kulturys viesturis daļa, par kū stuosta gruomota “Silva Linarte 21. gadsimta ainavā”. Tuos autors ir Dainis Īvāns, kurs labi paziņs muokslineicu i Daugovpiļs kulturys vidi.
Gruomotā izmontuoti materiali, kartenis i gleznu reprodukcejis nu Daugovpiļs Marka Rotko muokslys centra, Vīneibys noma, Ilonys Linartis-Ružys i Dacis Pudānis kolekcejom. Gruomota par Silvu Linarti radeita ar “Latvijas valsts mežu” i Vaļsts kulturkapitala fonda finansātuos Latgolys kulturys programys i Amerikā dzeivojūšuo Vīneibys noma arhitekta dāla Egila Vitanda finansialu atbolstu.
