Rokstu sagataveja: portals lakuga.lv

3. aprelī 17.00 stuņdēs Daugovpiļs Kulturys pilī puļcēsīs vairuoki Latvejā zynomi muokslinīki, kab lobdareibys koncertā izsaceitu sovu atbolstu Ukrainai, informej Daugovpiļs piļsātys pošvaļdeibys puorstuove Gunta Ločmele. Koncertu byus vareiba vērtīs ari tīšraidē iz ekrana Daugovpilī, Vīneibys laukumā.

Koncertā pīsadaleis taidi muziki i izpiļdeituoji kai Aija Andrejeva, Anmary, ansis, Antra Stafecka, Atis Ieviņš, “Bez PVN”, “Dabasu durovys”, “DAGAMBA”, “ELPA”, Intars Busulis, KATŌ, “Kautkaili”, “Laika Suns”, Patrisha, rolands če, “Sudden Lights”, “Tautumeitas”, “The Sound Poets”, projekts “LATVIA FOR UKRAINE” (Katrīna Gupalo, Loreta Reide, Gunārs Gaumigs, Miks Dukurs, Ilze Rijniece, Elizabete Vētra, “Audiokvartāls”, June River, Roberto Meloni, Edgars Vilcāns, “Sub Scriptum”, Anita Intaite), kai ari folklorys kūpa “Svātra”, kamerorkestris “Daugavpils Sinfonietta”, orkestris “Daugava” i kors “Daugava”.

Sadarbeibā ar lobdareibys organizaceju Ziedot.lv pasuokuma laikā tiks vuokti zīduojumi Ukrainys atbolstam – byus vareiba veikt skaidrys naudys zīduojumus Ziedot.lv kasteitēs, kai ari cylvāki tiks aicynuoti zvaneit iz zīduojumu numeri 90006086 (moksa par zvonu 1.42 eiro).

Vīns nu pasuokuma muokslinīku, grupys “DAGAMBA” dalinīks Valters Pūce pastreipoj, ka dūt koč drupeit gaismys itymā tik sarežgeitajā i gryutajā laikā ir cīši svareigi. “Paraleli karam Ukrainā nūteik informativais kars ari pi myusu. Tys, kū mes kai muziki varam dareit itamā situacejā, ir runuot par tū ar sovim klauseituojim, kab piec vareibys vaira mazynuotu propagandys iznycynūšū spāku.”

Sovpus dzīduotuoja Patrisha stuosta, ka laiks nu kara suoku jai ir bejs cīši gryuts, partū ka jai ir radinīki, kurī atsarūn karā īsaisteitajuos vaļstīs: “Maņ ir rodi Ukrainā, kurūs naasam tai ari spiejuši sazvaneit. Ir rodi Krīvejā, kurim niu juocīš vaļsts diktatora dieļ. Muni div bruolāni Boltkrīvejā tyka aizsyuteiti pyrmajuos rynduos armejā, kab dūtūs karuot iz Ukrainu. Jim tyka atjimti vysi sasazynuošonuos leidzekli, partū nav zynams, kur jī atsarūn i voi vyspuor vēļ ir dzeivi”.

Valters Pūce nūruoda, ka “ir cīši suopeigai vērtīs iz itū vysu, partū ka mums ir cīši daudz tyvu draugu Ukrainā, ar kurim sasazynojam gondreiž kotru dīnu. Jī soka lelu paļdis, ka mes reikojam koncertus Ukrainys atbolstam, partū ka tys jim paleidz rast spāku i motivaceju ceineitīs pret ituom kara brīsmem”. 

Jemūt vārā īrūbežuotū vītu skaitu Kulturys pilī, īlyugumus iz pasuokumu varams rezervēt īprīšk “Biļešu paradīzes” kasēs i ITE.

Aplīcynojūt sovu atbolstu Ukrainai, vysi dalinīki koncertā pīsadola breivpruoteigai.

Kai jau īprīšk viesteits, muzikis Ralfs Eilands jau vaira kai pyrma nedelis uzrunuoja Daugovpiļs piļsātu, kab tī sareikuotu koncertu “Ukrainas brīvībai”, tok piļsāta atsaceja, partū ka reikoj sovu koncertu 3. aprelī. Tai Ralfa Eilanda organizātais koncerts 19. martā nūtyka Rēzeknē.