Nu 7. da 10. juņam Latgolys Kulturviesturis muzejā (Atbreivuošonys alejā 102, Rēzeknē) ūtrū godu piec kuortys kadīna puorsavierss rūžu svātkūs – sadarbeibā ar SIA „Latroze” nu Siguldys Rēzeknē varēs na viņ apsaviert i sajust kai smuordoj ap 100 dažaidu sortu rūžys, nu ari nūpierkt kaidu rūžu sovam duorzam.

Izstuodis dorba laiki:

7., 8. junī 11:00 – 18:00
9. junī 10:00 – 16:00
10. junī 10:00 – 15:00

Četrys dīnys pīredzejušī SIA „Latroze” specialisti nu Siguldys daleisīs ar padūmim par rūžu audziešonu i kūpšonu.

Latgolys Kulturviesturis muzeja darbinīki car, ka pamozeišam eistynuosīs senejuo ideja – Rēzeknē klius kai zīdūšs rūžu duorzs, kur reizem var satikt princesi Rūžu! Rūžu izstuode rēzeknīšim pīduovoj īspieju simboliski īdzeivynuot viesturiskū legentu par princesi Rūžu, kurei dzeivoj piļskolna dziļumūs i gaida drūsus, aktivus i radūšus sovys piļsātys kūpiejus.

Rūžu izstuodē varēsit satikt ari pošu princesi Rūžu, tod dzierdiesit legendu par Rūžu i kūpā ar jū varēsit pīsadaleit radūšojā darbneicā. Radūšuo darbneica byus atvārta: 7. junī 11:00 – 12:00, 8. junī 16:00 – 18:00, 9. junī 10:00 – 12:00.

Īejis moksa izstuodē: školānim i studentim Ls 0,20, pīaugušajim Ls 0,40, pyrma školys vacuma bārnim – breiva.

Sagatavieja Maija Upeniece, Latgolys Kulturviesturis muzejs

Karteņā – Rūžu izstuode Rēzeknē 2011. goda junī. Foto – A. Bondarenko.