Rokstu sagataveja: portals lakuga.lv

11. aprelī Rēzekni apmeklēja Vaļsts prezidenta kancelejis puorstuovi, aplīcynojūt, ka Latvejis Vaļsts prezidents Egils Levits 27. aprelī pīsadaleis Latgolys kongresa atkluošonys pasuokumā, atkluos kongresu, informej Latgolys kongresa dorba grupys puorstuove Maija Upeniece.

Kongresam īsnāgts ap 80 prīšklykumu kongresa rezolucejai. Itamā šaļtī Saīta rezolucejis izpiļdis komiteja (SaRIK) sadarbeibā ar Latgolys planavuošonys regionu i piļsūniskajom organizacejom rauga apkūpuot prīšklykumus, kab kongresā varātu pīduovuot puorskotomu i rysynomys problemys (eistermiņā i ilgtermiņā) īkļaunūšu dokumentu.

Kongresa programā ir nalelys izmainis, ar precizātū kongresa programu var īpasazeit ITE.

Vyss pasauļs sekoj nūtykumim Ukrainā, sevkurs saprūt, ka situacejis atteisteiba karā ir naprognozejama, tok sovu gataveibu pīsadaleit 28. apreļa diskusejuos ir aplīcynuojs Ukrainys viestnīks Latvejā Oleksandrs Miščenko. Kongresa organizatori atguodynoj — ka gadīnī naesi pīsasacejs kongresam, 28. apreļa zynuotniskuos diskusejis varēs vāruot ari attuolynuoti.

28. aprelī 19.00 kongresa delegati apmeklēs Rēzeknis teatra “Joriks” izruodi “Muols”, īsadzilinojūt i puordūmojūt amatnīceibys (itūreiz — pūddarnīceibys) lūmu Latgolys kulturys telpā.