Rokstu sagataveja: portals lakuga.lv

Sastdiņ, 18. junī, Lelvuordē i tīšraidē Latvejis Televizejā izskanēja raidejuma “Latvijas Sirdsdziesma” goda nūslāguma finals, kurā ar dzīsmem latgaliski pīsadaleja ari Jurs Ostrovskis i Igauņu saime, skateituoju bolsuojumā dabojūt attīceigi 14. i 4. vītys.

Latvejis Televizejis raidejums “Latvijas Sirdsdziesma” ir skateituoju sovulaik īmeiļuotuo raidejuma “Latvijas šlāgeraptauja” tradiceju turpynuotuojs. Vysu raidejuma sezonu tuo tapšonā īsasaista ari skateituoji, kurim ir vareiba bolsuot i izavielēt dzīsmi, kura ir peļnejuse sajimt Latvejis “Gada Sirdsdziesmas” titulu.

“Latvijas Sirdsdziesma” ir sirsneigi muzykals raidejums, kurā teik atspīgeļuotys tautā popularuokuos latvīšu muzykys dzeivis nūrises. Kotru sezonu raidejums ari apceļoj vysu Latveju, vaicojūt cylvākus, kuri uztur dzīsmuotuos tradicejis sovūs nūvodūs, ari sveic i atguodoj muzykys dižgarus, bez kuru nabyutu īdūmuojama latvīšu vīgluos muzykys atteisteiba.

Ituo goda finala dalinīki 18. junī sasatyka raidejuma finala koncertā Lelvuordē Rembatis parkā, kur iz skotivis uzastuoja skateituoju sezonys garumā izvālātī muziki: grupa “Lauku muzikanti”, Jānis Moisejs, Kaspars Markševics, Tihovsku saime, Ainars Bumbieris, Juris Ostrovskis, grupa “Muiža”, Igauņu saime i c. Raidejuma “Latvijas Sirdsdziesma” finala koncertu vadēja vysys raidejuma sezonys vadeituoji Velga Vītola-Amantova i Normunds Zušs, kurš pats ir ari labi zynoms latgalīšu dzīduotuojs i grupys “Galaktika” dalinīks.

Itymā godā finalā sasaceņte 15 dzīšmu. Apkūpojūt LTV1 tīšraidis skateituoju bolsuojumu, par uzvarātuoju tyka atzeita Aija Legzdiņa, kura izpiļdēja dzīsmi “Ievziedos”. Vysu finala dalinīku vydā pīsadaleja ari treis muziki i apvīneibys nu Latgolys – Jurs Ostrovskis ar dzīsmi “Vacuoku sātā” dabuoja 14. vītu, Tihovsku saime ar “Noiet saule vakarā” – 6. vītu, bet Igauņu saime ar “Aneitis vaļss” palyka tiuleņ aiz gūda pjedestala 4. vītā.

Vysa koncerta īrokstu nūsavērt var ITE.