Fotošaļtenis nu pasuokuma pīduovoj Aivars Mackevičs (www.travelnews.lv)

5. febralī Rēzeknes kuļturys nomā nūtyka latgalisks pasuosīņs, kas beja veļteits Latvejis Radejis raidejumam “Latgolys Vuords” i tuo redaktoram Bronislavam Sprydzānam opolojā dzeivis jubilejā. Iz pasuokumu tyka aicynuoti kulturys i sabīdriski aktivī darbinīki, kai ari sevkurš, kam nav vīnaldzeiga latgalīšu volūda i tuos nokūtne.

90.godu suokumā radejis raidejums “Latgolys Vuords” tyka izveiduots ar mierki paruodeit latgalīšu volūdys vierteibu. Par tuo redaktoru kliva Nagļu pogosta dzeivuotuojs Bronislavs Sprydzāns. Godu garumā jis naatlaideigi raudzejs byut kluot vysūs nūtykumūs Latgolā, kai ari maksimali daudz  informacejis dūt sovūs raidejumūs par Latgolys ļaudim.

Svineigais pasuokums byuteibā tyka baļsteits iz latgalīšu volūdys populariziešonu i nūzeimeigumu. Pasuokumā beja īspieja atsavērt iz 20 godu laikā padareitū, kai ari īsaklauseit B. Sprydzāna vadeituo raidejuma intervejuos ar dažaidim cilvākim – politikim, kulturys darbinīkim, muzykantim i ari prostajim lauku ļaudim.

Jubilejis pasuokums nūtyka latgaliskā gorā. Muzicieja “Boļtī luoči”, Latgolys damu pops, Eriņu saime, “Bez PVN” i.c.