Rokstu sagataveja: portals lakuga.lv

Apvīneiba “Latgalīšu Reps” izlaiduse jaunu dzīsmi i videoklipu, kurā dzierdams motivs nu slovonuos dzīsmis “No woman, no cry”, viestej grupys puorstuovu atsyuteituo informaceja.

Dzīsme, kurei sovu pyrmatskaņuojumu pīdzeivuoja aizvadeitajā nedeļā radejis stacejā “Pieci.lv”, apvīneibaa publiciejuse ari videoklipu, kurs fiļmāts ituo gods junī Ludzā i tuos apleicīnē, tuo stuosts ir pīlāguots dzīsmis tekstam – attīceibu gola stadeja.

“Latgalīšu Reps” dalinīks Ivo Grigalis par dzīsmis tapšonu stuosta: “Dzīsme roduos spontani. Kaidā vālā vokorā, siežūt sātā pi Didža, pamaneju, ka juo sātys lūgim nav aizkaru. Iz vaicuojumu deļkuo tai, Didzis atsaceja: “Nav buobu, nav aizkaru!” Itei fraze aizagive, atrodom Boba Marleja dzīsmis “No woman, no cry” motivu i golā roduos pīdzīduojums, kas piečuok apauga ar tekstu, bolstūtīs iz kotra pīredzis stuostu par toksiskom attīceibom ar sīvītem.”

Dzīsmis videoklipu taiseja Andrew Dree, tuo taiseišonys dorbūs pīsadaleja Ivo Grigalis, Didzis Kozlovs, Nikita Turubanovs, Rihards Spatz i Daiga Laizāne, bet pi pošys dzīsmis struoduoja Ivo Grigalis, Didzis Kozlovs i Artūrs Lipovskis (LilGrown) (vokals, aranžeja i produciešona), kai ari dzīsmis skanis apstruodi taiseja Jānis Šmediņš (PrimeTime Latvia).

Ka gribīs satikt i dzierdēt grupu “Latgalīšu Reps” tyvuokā laikā, tod itūnedeļ, 9. julī, jī uzastuos Ūgris estradis vosorys sezonys lelkoncertā.