Ka pīna goldi izmierst, tī nav juoaizmierst – sataiseits Instagram konts par pīna goldim
Rokstu sagataveja: portals lakuga.lv
Jau vairuokus mienešus socialajā teiklā Instagram var sekuot leidza pīna goldu galerejai i stuostim eipaši tam izveiduotā kontā @pina_golds. Tū uztur Amanda Anusāne, jai paleidz ari Vizma Mičule, tok stuostus īsyuta konta sekuotuoji. Cikom pamatā nu Latgolys, tok Amanda i Vizma cer, ka izadūs aptvert ari vysu Latveju i varbyut na tik tū.
Amanda stuosta, ka pīna goldi kai objekti jū pīsaistejuši jau seņ, tok ideja par Instagram kontu rodusēs pamozam. “Paguojušajā zīmā, braucūt ar Vizmu, leidza beja pasajāmuse pīna butele, i tai nateišom saguoja sataiseit fotoseseju pi vīna pīna golda. Tai vysu ceļu diskutiejom par pīna goldim, PVD (Puortykys i veterinarū dīnastu), bezīpakuojumu sistemu agruok i tagad, pīnu, saimisteibom i vysu cytu, kas saistuos ar pīna goldim.
Šūvosor brauču nu Rēzeknis iz laukim i vierūs, ka munā dzeraunē Kaupierūs pasaruodejs svaigs, malns pīna golds, nu tik jau šmuks, ka nūdūmuoju: “Vot, ka es byutu influencers, tod varātu tū īlikt IG, tai Kaupieri varātu palikt slaveni, jo tys pagaidom ir krutuokais objekts dzeraunē.” Starp cytu, tū pīna goldu ir taisejs vītejais galdnīks,” stuosta Amanda. Kai izškirūšais elements Instagram konta izveidē bejuse Lūznovys muižā apsaveramuo Vinsenta Flikigera personalizstuode “Noir sur Blanc un citas krāsas”, kur ari radzams beja pīna golds, kam dalikti spuorni i tys teik pozicionāts kai Latvejis lauku ainovu pagaistūša vierteiba. “Tai tī pīna goldi ik pa laikam maņ pa pruotu doncuoja, bet izstuode beja kulminaceja, kod es eistyn saprotu: “Nā, itī mozī arhitekturys pīminekli navar tai pagaist napamaneiti!” Cīši daudzim ir atminis ar tim, pīna goldi daudz kū viestej par laiku i mums. Par tū izveiduoju Instagram profilu i nūsauču par “pīna goldu viestnīceibu”. A poša profila ideja ir pajimta nu Instagram profila @societyofloneley, kurū maņ paruodeja Vizma. Itymā profilā vīna meitine aicynoj cylvākus īsyuteit jai vīntuļūs krāslus nu vysaidu naīrostu vītom,” stuosta Amanda.
Kas taišni pīna goldūs tik eipašs? “Pyrmom kuortom – tys, ka pīna goldu navar nūpierkt veikalā gotovu, tam nav vīnuota standarta. Kotrys saiminīks pīna goldu taisa piec sova individualuo “projekta” i pīejamajim resursim. Puorsvorā izejmaterials ir kūks, bet ir arī dažaidys metāla konstrukcejis. Ka veramīs iz pīna goldu dizainu, tod ari tys ir piļneigi breivs cylvāku fantazejis liduojums – daži pīna goldi ir taidi cīši minimalistiski, cytūs ir kaidi dekorativi elementi. I radzāts pat pīna golds ar kūkgrīzumim. I veļ seviškuokus pīna goldus padora tys apstuoklis, ka pīna goldu laiks ir skaiteits. Tagad daudzuos vītuos pīna goldi vaira nateik izmontuoti pīna nūdūšonai, par tū ka pīna mašyna pīnu pajam “pa taisnū” nu pīna muojenis, i pīna mašynys ir apreikuotys ar šliutini, pa kuru pīnu izpumpej nu konu, kurom vaira navajag byut salyktom iz paaugstynuojuma – tuos var stuovēt iz zemis. Deļtam pīna golda golvonuo funkceja – platforma ārtai pīna konys pajimšonai i īlīšonai mašynys tvertnē – vaira nav vajadzeiga. Bet asam īvāruojušys, ka daudzi pīna goldi aizviņ kolpoj kai posta kasteišu stativi,” tai Vizma.
Cylvāku interese i atsauceiba asūt puorsteidzūši lela. “Atsauceiba ir nagaideiti lela, es nacerieju, taiseju tik tai – arhivam. Maņ cīši pateik auditoreja, asmu atkluojuse tik daudz interesantu Instagram profilu, kurūs nazynuotu, ka nabyutu ituo profila. Cylvāki ir aktīvi, spīž laikus, atbiļd iz vaicuojumim, roksta komentarus, zinis, īsyuta sovys biļdis. Cīši daudzi stuosta sovys atminis, tys ir tik jauki. Ir daudz napublicātu biļžu, kaidam laikam byus gona. Maņ prīca par kotru atgrīzeniskū saiti nu auditorejis,” soka Amanda.
Vysvaira pīna goldu asūt palics taišni Latgolā. Īspiejams, deļtam, ka Latgolā ir vairuok mozūs saimisteibu, kuruos pīns teik ražuots taidūs apjūmūs, ka nūdūšona iz pīna golda ir ārtuokais veids, kai pīnu dabuot pīna mašynā. Ari vysvaira īsyuteitūs stuostu i karteņu ir taišni nu Latgolys. “Ir ari daži Vydzemis pīna goldi. Nu Kūrzemis i Zemgalis pagaidom nav, bet ceru, ka tī ari kaids atsarass. Ik pa laikam pasaruoda kaids interesants fakts voi atkluosme. Pīmāram, Zemgalē pīna goldu sauc par “kannu beņķi” voi “piena krāģi”, Vydzemē – “piena steķi”, Kūrzemē nazynu, laikam taipat – “piena galds/novietne”, tik zynu, ka muna vacuma paziņa Kūrzemē dzeivē nav redziejuse pīna golda sovā pusē,” Amanda secynoj, ka tī vys jau vaira zyvs giva, na gūvs turēja. Taipat Amanda i Vizma atkluojušys, ka ari Suomejā i Norvegejā vys vēļ ir gona daudz pīna goldu, Suomejā pat asūt tūs muzejs.
Amandai i Vizmai natryukst sovu personeigūs atmiņu par pīna goldim. “Vysu bierneibu dauzejomīs iz tūs, niu krystabārni dora tū pošu iz tuo pat babys pīna golda, tei ir tik sylta sajiuta, it kai vērtīs iz sevi nu molys. Ar draudzinem ari častai tykomīs pi vīnys voi ūtrs saimis pīna goldu. Kod pasaruodeja teleponi, tod pīna goldu izmontuojam kai stativu, iz kuo nūlikt teleponu ar taimeri i taiseit glupys biļdis voi video, tūlaik nadūmuojam, ka vajadzēja dareit ūtraiži – biļdētīs ar pīna goldu. Pīna golds pusaudžu godūs beja taida loba platforma, kur ar draudzinem pīsēst i patolkavuot. Laukūs ceļu moluos jau nav benču, i itū funkceju mums labi piļdeja pīna goldi. Pi tam pīna golds ir augšuoks par sprostu benči, i vosorys vokorūs iz pīna golda var labi vērtīs zvaigžņu leitus. Guli izalaids iz pīna golda i verīs iz Pīna ceļu!” Partū ari juos lobpruot uzklauseitu cytu atminis par pīna goldim. “Nūteikti grybātūs savuokt vaira cylvāku stuostu ar atmiņom par pīna goldim. Pat, ka tuos ir kaidys teiri sentimentalys voi personeigys atminis par zierņu ieššonu iz pīna golda dzeraunē pi babys voi bučuošonūs iz pīna steķa piec zaļumballis – Pīna goldu viestnīceiba prīcuosīs par kotru stuostu ar itim gaistūšajim Latvejis ainovys objektim.”
