Dzejūļu autore: Ligija Purinaša

Latgalīšu literatei Ligijai Purinašai itymā rudinī izīs ūtrais dzejis kruojums “pierobežas”. Ar dzejūlim nu tuo pīduovojam īpasazeit ari portala Lakuga.lv skaiteituojim. Sarunu ar Ligiju par jaunū kruojumu i latgalīšu literaturu var atrast ITE.

sīvīšu varys poziceja
ir bezīrunu autoritarisms
šaļtim veirīšim ir leluokys
sirds i plaušys deļ gaisa
ar jim var sarunuot
bet ka navar
tod varūt vysmoz puorgulēt
sīvītem pruotā ir plani
KA-NABYUS-PA-MUNAM
TOD-NABYUS-NIKAI

##

Jaunovai Marijai
ir nimbeņš nu LED
gaismeņu

tu mani inspirej i
tu mani preparej

sova byuteiba juopasliepņ
aiz deveņu omotu
litaneju skaiteišona kai
sevis attaisnuošona
muna vaine
muna vysleluokuo vaine
one, two, three
one, two, three

##

laiks ir apvuorduots
jiutu ganeituojs
skumis puorskriejušs
pūru
dasasytušs vylkim
i pa naktim
gari i žieleigi
vaid

piec kuortys
juos sauc
teve mane
myusu rodu
i draugu
i vysu myusu
zaudejumu gvarde
apaun brunis i īt
meklēt pādejūs
vylkus voi varbyut
myusu aizbāgušuos
skumis

tuos puorsamej
vuornuos i dasasyt
starku boram
nazkam jī atness bārnus
bet nazkam
myusu muokslinīciskuos koncepcejis

##

sasamīrēt ar mozumeņu
vyduvidejū
tai vuiceja

sātā školā dorbā
pajimt drusku mīlesteibys
ļūbēt pa drusceņai
pa drupeitei
drupačeņai

vysu izreizis navar
vajag taupeit
jiutys i naudu
dasadūrt pa svātkim
tai ka pījimts pyrma
nūsaslēpt zam sagys

veirs palīk veirs
sīva palīk sīva
da kuozu ni ni
piec kuozu kai saīs
lai nadzierd bārni
i sābru Ļuce
tok rozness
pa vysu dzerauni

mīlesteiba ir
puoruok duorga
roskošs deļ
cylvāku mozajūs
mīstūs i pīrūbežā

ka pītryuks pošim
to nabyus kas aizdūs

##

korstums
bezviejs

divu cylvāku attīceibys
regulej hipotekarais kredits
attīceibu statuss i
etniskuo pīdereiba

īspiejams —
ari empatejis tryukums
i komunikacejis problemys
mozvierteibys kompleksi i
bierneibys traumys

siežu krostā i verūs
kai atīt kugis
pylns jauneibys naivuma
i vacuma naticeibys

piec pādejuos gluozis
jis izdzyna vysus nu sātys
apsasēde pi klavīru
i suoce dzīduot

##

meiluo duorguo lobuo
začeits kačeits
susureņš bumbuleits
žubeite pučeite

bolta vuorna
bļauka rogona
valna buoba
sātana nīdre
slūtyskuota plyukuotuoja

identitate ir plyustūša
kai divu cylvāku čats
balleitis vydā
kod vyss kas izdzarts
ir ūtra cylvāka laiks

tev nav vītys
tu grybātu vaira

Lidija Purina
Ligita Purinša
Līga Purikaša
Līdija Puriņa
Liga Purainiša
Līkija Purpinaša
Līgija Puranaša
Ligija Purinaša

sauc kai gribi
tys namaina tū ka
muna vīta zam saulis
nasasaraus

##

es runoju aprautūs teikumūs
es nazynu kū lai tev soka
kai lai mīrynoj
kai lai pastuosta

ka dzeivē vyss proīt, aizīt, suocās i beidzās, ka patīseiba nav vīna, i taisneiba ari taida nav, i vyss nūteik iz lobu, i mīlesteiba ir ar suokumu i golu, i ka cylvāka sirds vysu var turēt, ari naidu, viņ nuove vysu izleidzynoj, i es monu, ka tovs bolss palīk mīreigs, koč gryušai i sarežgeitai, i vīntulai, es zynu, vysu, vysu tū zynu, naraudi, lobais, lobenais, vysu aizskoluos iudiņs, vysu samiercēs leits