Apvīneiba “Naktenīks un Reiti” pīduovoj dzīsmi “Duovynoju Tev”
Rokstu sagataveja: portals lakuga.lv
Īrokstu studeja “Bigmaar’s Records” publiciejuse da ituo moz zynomuos apvīneibys “Naktenīks un Reiti” dzīsmi “Duovynoju Tev”. Tuos īroksta pīsadola ari izpiļdeituojs Mygla. Dzīsmi var nūsaklauseit īrokstu studejis profilā teiklā YouTube, līcynoj studejis publiski daīmamuo informaceja.
Jaunuo dzīsme “Duovynoju Tev” ir apvīneibys ūtrais skaņdorbs, kas niu nūsaklausoms publiski. Atbiļdūt iz portala lakuga.lv vaicuojumu par tū, kas tod ir “Naktenīks un Reiti”, “Bigmaar’s Records” Māris Keišs ir nūslāpumains: ““Naktenīks un Reiti” ir grupa ar nazynomu cylvāku skaitu – nivīns da ituo nav oficiali pīregistriejs, cik tod daleibnīku grupā ir. Kotrai dzīsmei mainuos ari grupys izpiļdeituoju sastuovs, leidz ar tū ari iz prīšku navar paredzēt, kas tod byus gaidoms. I varbyut labi, ka tai. “Duovynoju tev” īrokstā ir pīsadalejuši Agrīs Pīna Reits, Lopss Reits i Mygla.”
Māris soka, ka itūreiz grupai ir saguojuse mīlesteibys dzīsme i atkluoj, ka vīneigais fakts, kurs zynoms par “Naktenīks un Reiti” darbeibu, ir, ka 2023. gods pyrmajā pusē gaidoms grupys albums “Audziks”.
Atguodynuojumam – taišni īrokstu studeja “Bigmaar’s Records”, kas sovu sātys vītu atroduse slāgtajā Upītis pamatškolā Bolvu nūvodā, itūgod Latgalīšu kulturys goda bolvā “Boņuks 2021” beja publikys simpateju bolvys “Žyks” sajiemiejs. Bolva itūgod tyka pasnāgta jau catūrtū reizi i tuos sajiemieja nūskaidruošona organizej portals lakuga.lv i Latvejis Sabīdryskuo medeja portals LSM.lv. “Bigmaar’s Records studeja struodoj pi vusa i ar vusīm, bet pats golvonais – rauga radeit latgalīšu modernuos muzykas šedevrus!” tai apjiemeibys pylns soka Māris Keišs. Vaira izzynuot par studeju var intervejā ITE.
