Rokstu sagataveja: portals lakuga.lv

Bolvu nūvods aicynoj iz breineigu garšu i sajiutu pīdzeivuojumu Zīmeļlatgolā – “Sātys kopejneicu dīnys 2022”. Bolvu nūvoda saiminīki gostus gaideis ar eipašu vosorys svātku sajiutu, gordim iedīnim, kulturys programom, produkcejis tierdzenim i cyta veida aktivitatem.

Bolvu nūvoda Sātys kopejneicu dīnuos planavuota boguoteiga programa ar vysaida veida gordumim. Pīduovojam īpasazeit ar kopejneicom, kuramuos byus vareiba ari izbaudeit latgaliskus iedīņus voi eipašys aktivitatis.

Brīžucīma senejūs omotu meistaru cīma kopejneica “Cārmyukša”

Brīžucīms ir vīta, kur eistyni latgaliskā vidē teik kūpti i gūduoti senejī omoti i prasmis. Improvizātys kopejneicys īkuortuotā pogolmā pi Brīžucīma Tautys nomā ar pošu gataveitim lobumim sagaideis struodeiguokī i vīsmīleiguokī brīžucīmīši. Te kotrys byus gaideits iz kūpeigom ļustem latgaliskā gaisūtnē. Byus vareiba pagaršuot saimineicu sātā sītū sīru, pošcaptu maizeiti, sātys kapciejumus, lauku tortus, kas gataveiti piec seneju, montuotu receptu.

Iedīņu cenys nu 1,00–1,50 eiro.
Dorbalaiks nu 11 leidz 14 stuņdem.
Adrese: “Gaismas”, Tautys noma pogolms, Brīžucīms, Brīžucīma pogosts, Bolvu nūvods, telepons: 25444621.

“Zeļčusola” Škilbānūs

Vareiba gasteit eistyni senejā Latgolys sātā, kur var saplyust ar dobu i senatni, īpazeit viesturi i sajust laika ritu. Zeļčusola ir tekstilmuokslineicys, projekta “#100dečiLatvijai” autoris Annelis Slišānis Latgolys lauku sāta, kas atsarūn viņ puora symtu metru nu Krīvejis rūbeža, tū īskaun dabeiguos pļovys i lynu muorki.

Zeļčusolys gosti vareis baudeit pošu audzātus duorziņus, maizis ceplī captu rudzu maizi, suoldskuobmaizi i sāklu maizi. Byus ari meicāti buļbi, sipisnīks, ozbora putra ar pupom, Zeļču ūgu maize i pļovu čajs.

Cena par vysu pīduovuojumu 15 eiro nu personys. Kluotyn byus vareiba apsavērt Annelis Slišānis muokslysdorbu izstuodi i pīdzeivuot gruomotys “Tuoraga stuosti” skaitejumu.
Dorbalaiks: 27. i 28. augustā nu 11 leidz 18 stuņdem. Īprīškeja rezervaceja obligata.
Adrese: Janki, Zeļči, Škilbānu pogosts, Bolvu nūvods, telepons: 29754060

“Rekovys dziernovys” Škilbānu pogosta Rekovā

“Rekovys dziernovuos” var nūbaudeit latgalisku iedīni, kas gataveits nu vītejūs produktu piec senejūs recepšu. Vīna nu golvonūs iedīņu sastuovdaļu ir zemnīku saimisteibys “Kuotini” (“Kotiņi”) saražuotuo produkceja.

Gostim byus vareiba nūgaršuot mīžu grūbu zupu, duorzinu buļjonu ar pupu kraukškim, pierļu grūbu putru ar taukūs captim seipulim, palākūs zierņus ar špeku, pupu bīzeni, zierņu i pupu kotletus, pierļu grūbu desertu, auzu putraimu putru ar žuovātu augļu keiseli. Byus vegetaruo i klasiskuo aba “vysāduoju” iedīņkarte, kai ari iedīņs vegānim i bezglutena produkceja.

Pīduovuojumu cena 12 eiro par personu. Īprīškeja rezervaceja obligata.
Papyldu ir vareiba apsavērt “Kuotiņu” saimisteibu (īprīšk juopīsasoka pa teleponu: 26422231). Dorbalaiks: 27.–28. augustā nu 11 leidz 17 stuņdem.
Adrese: Rekovys īla 19, Rekova, Škilbānu pogosts, Bolvu nūvods, telepons: 29132664.

“Pi Ičas” Bierzpilī

Sātys kopejneicu dīnu laikā aktivī Bierzpiļs dzeivuotuoji izveiduojuši improvizātu kopejneicu “Pi Ičas”, kas pīduovuos nūbaudeit Bierzpiļs pusis gordūs i suoteigūs iedīņus i Latgolys vīsmīleibu. Kopejneicys reikuotuoji ari pīduovuos vareibu īpasazeit ar Bierzpiļs pogosta kulturviesturiskū montuojumu: Bieržu bazneicu, Ičys apmetni, tematiski ainaviskū parku.
Nu gordumu byus vareiba baudeit iz gunkura gataveitū spāka putru, ar pīdavom – mozsuolejim ogūrčim, lauku ryuguli ar zaļumim. Soldonajā – sipisnīka sacapumu ar Bieržu pūrā laseitūs dzērviņu keiseli.

Iedīņu cenys nu 3,50–5,00 eiro.
Dorbalaiks: 27. augustā nu 11 leidz 17 stuņdem. Īprīškeja rezervaceja obligata.
Adrese: Bierzpiļs pogosta tematiski ainaviskais parks, Bolvu nūvods, telepons: 29482775, 28373477.

Vysu sātys kopejneicu pīduovuojumu var apsavērt kartē ite: ej.uz/MKziemellatgale22