Rokstu sagataveja: portals lakuga.lv

Rēzeknis Muokslys i dizaina vydsškola eistynuojuse Vaļsts kulturkapitala fonda atbaļsteitu projektu “Dvieļu raksti”. Projekta mierkis ir veicynuot namaterialuo kulturys montuojuma puormontuošonu i saglobuošonu, kai ari rūsynuot tradicionaluos kulturys i jaunradis mejīdarbeibu.

Projektu “Dvieļu raksti” eistynuoja Rēzeknis Muokslys i dizaina vydsškolys (RMDV) Tekstilizstruoduojumu dizaina izgleiteibys programys audziekni ar pedagogu Inesis Ratniecis i Lienītis Ratniecis atbolstu.

Projekta gaitā tyka organizātys pīcys ekspedicejis, kuru laikā tuo eistynuotuojis īpasazyna ar amatnīkim voi dvīļu eipašnīkim i uzklauseja stuostus par dvīļu izgataveišonu. Dvīli tyka ari safotografāti, taipoš tyka izveiduotys tehniskūs parametru aprokstu skicis, nūsokūt izstruodis tehniku, tyka analizāti dvīļu roksta elementu kuortuojumi, dvīļu izveidē izmontuotī materiali i audumi.
Piec ekspediceju jau nu fotografeju tyka radeiti detalizāti roksti i izveiduoti tehniskī zeimiejumi, pasasokūt kurim, niu sevkuram amatnīkam ir vareiba izgataveit leidzeiga tipa dvīļus.

Ekspedicejis laikā RMDV uzskaitis materialu fonds tyka papyldynuots ar vaira nakai symts dvīļu fotografejom, nu kurūs, izavielejūt Latgolai rakstureiguokūs dvīļus, izveiduota digitaluo būrtneica, kurā apkūpuotys 20 dvīļu fotografejis ar tehniskūs rokstu i auduma zeimiejumim. Rokstu būrtneica ir izplateita nūvoda bibliotekuos, kulturys centrūs i lītiškuos muokslys studejuos, tei atrūnama ari digitalā veidā ITE.

Kai stuosta vīna nu projektu eistynuotuoju Inese Ratniece, drupeit gryuteibys saguoduoja attuolynuotais režims pandemejis laikā, deļ kuo projekta izstruode tyka pagarynuota par vasalu godu.

“Eistynojūt itū projektu saprotom, ka ir cīši daudz materialu, tok dīvamžāļ gona bīži datryukst cylvākresursu, kab tūs kvalitativi sakuortuot. Cīši tryukst pietnīcyskuos dalis, pīmāram, fiksātu dorbu autoru i izstruodis godu.

Skaidrys, ka audums nav tys materials, kas var sasaglobuot myužeigai, deļtam itaida apzynuošona i fiksiešona byutu cīši svareiga,” tai Inese Ratniece.

Inese ari papyldynoj, ka RMDV regulari eistynuoj projektus, kas saistami ar audziekņu īsaisti i dūmu par vierteibu sajiutys radeišonu i tradiceju puormontuošonu. Pyrma ituo projekta leidzeigs bejs par pierts dvīlim, niu otkon ir ideja, ka vajadzātu izpieteit ari dvīļu skareņu veidus.

“Tai saīt, ka vīns projekts rūsynoj iz cytim projektim,” papyldynoj Inese Ratniece. Jei ari pastreipoj, ka cīši lels paļdis juosoka vysom īsaisteitajom pusem: piertneicom Gitai Usānei i Nellijai Kiščenkoi, Indrys audieju kūpai, Ludzys amatnīku centram, Tautys lītiškuos muokslys studejai “Dzīpariņš”, kai ari RMDV absolventei Ivetai Gabrānei.

Kartenis: projekta gaita, Inesis Ratniecis arhivs.