Grupai “Dabasu durovys” jauna dzīsme “Asteris” i ceļš iz jaunu albumu
Rokstu sagataveja: portals lakuga.lv
Grupa “Dabasu durovys”, īzeimejūt jauna grupys albuma īrokstu, publiciejuse jaunu dzīsmi “Asteris”, kurys tekstā izmontuota diveju autoru – Inetys Atpilis-Juganis i Mārītis Slišānis – dzeja, viestej grupys publiskuotuo informaceja.
“Dabasu durovys” Latgolys i ari Latvejis mārūgā ir labi zynoma grupa. Pyrmais albums ar nūsaukumu “Lepetnīks” izguoja 2008. godā. Sovpus kūpumā grupa leidz šam izlaiduse pīcus albumus. Grupā pīsadola Arņs Slobožanins (vokals i gitara), Aleksandrs Tamans (bungys), Māris Veliks (gitara), Valdis Rundzāns (basgitara), Vladimirs Šuvalovs (akordeons). Gona bīži kai basgitarists grupai pīsavīnoj ari Mārcis Lipskis i kai gitarists Romāns Sladzis.
Grupys “Dabasu durovys” liders Arņs Slobožanins viestej, ka grupai cytugod izīs sastais studejis albums. “Itūšaļt albums ir tapšonys stadejā. Piļneibā gotovys ir treis dzīsmis, nu kurūs izavielieju publicēt dzīsmi “Asteris”,” tai stuosta Arņs.
“Jaunais albums byus konceptuals, albuma nūsaukums “Dīnys i nadīnys”. Albums byus par pīradzātū, pīdzeivuotū, par personeigim nūvāruojumim, īškejim puordzeivuojumim. Klausūtīs albumu, kotrs pats varēs saprast tuo koncepceju.”
Arņs ari papyldynoj, ka leidz albuma atkluošonai cytys dzīsmys natiks publicātys, viņ pyrma pošys albuma izīšonys tiks publiskuots golvonais singlys. Albumā kūpumā byus desmit kompozicejis.
Dzīsmis “Asteris” skice rodusēs Latvejis Radejis Latgolys studejis myusdīnu latgalīšu literaturai veļteitajā raidīrokstā “Puslopys”, kura laikā Arņs īrosts roda dzīsmi ar raidīroksta gosta vuordim. Itūreiz dzīsmē izmontuota diveju autoru – Inetys Atpilis-Juganis i Mārītis Slišānis – dzeja.
