Rokstu sagataveja: portals lakuga.lv

Izdūta pyrmuo kruosojamuo mandalu gruomota latgaliski “Byut!”. Tuos autore ir Kristiāna Rancāne, kura dorbojās sovā mozajā uzjāmumā “SimplyLove”, rodūt vysaiduokys īdvasmys gruomotys i uzleimis.

Kristiāna stuosta, ka kruosojamuo mandalu gruomota “Byut!” ir par Latgolu – dobu, dorbu, saimi, draudzeibu, mīlesteibu, latgaliskū identitati i patriotismu. Tamā ir 60 mandalu i tikpat Kristiānys atziņu par jai svareigajom īprīšk nūsauktajom vierteibom, vēļ ari vīta latgaliskūs citatu i atziņu pīraksteišonai, kai ari treis rodūši uzdavumi, kurūs kotrys var izzeimēt sovu mandalu. Ar gruomotu autore gryb izsaceit sovu pīdereibu Latgolai, kai ari pastreipuot tū, ka, lai kur myus aizvastu dzeive, ir juoatguodoj sovys saknis i juokūp pīdereibys sajiuta.

Sovu mozū uzjāmumu “SimplyLove, IK” jei izveiduojuse 2021. godā. “Vyss suocēs ar dūmu, ka grybu koč kū sovā dzeivē maineit. I tod beja myužeigais vaicuojums – kai tū izdareit? Kaidu vokoru, atīmūt sātā nu dorba školā, es veiram īsaminieju par tū, ka grybu koč kū izveiduot, radeit koč kū, tok nazynu, kas varātu byut tys, kas patyktu i saītu. Veirs īrūsynuoja pīraksteit vysys – pat puordrūsuokuos – idejis, kas īt pruotā. Vokors tyka aizvadeits namiteiguos puordūmuos i, laižūtīs mīgā, maņ pruotā īguoja ideja par sapynu, īceru i mierku gruomotu “Sapnim būt!”. Tys ari ir pyrmais “SimplyLove” produkts. Taišni tam izzeimieju pyrmuos mandalys. Roduos ideja ari par mandalu gruomotu, kurā sūpluok mandalom ir ari munys atzinis par mīru. Tai roduos kruosojamuo gruomota “Mandalas mieram”. Piečuok roduos ari treis uzleimu komplekti ar īdvasmojūšim, humora pylnim i romantiskim uzrokstim. I niu asu izdavuse pyrmū kruosojamū mandalu gruomotu latgaliski – “Byut!”,” stuosta Kristiāna.

Jaunajā gruomotā Kristiāna ar sevi īpazeistynoj kai “latgalīti, kura poša narunoj latgaliski, tok sirdī cīši mīļoj sovu zemi, bezgaleigū plašumu i skaistumu”. Partū interesanti izzynuot, deļkuo jai ruodejīs svareigi izdūt gruomotu taišni latgaliski. “Maņ jau seņ beja dūma par tū, ka grybu izveiduot koč kū latgaliski, tok vysod tryuka puorlīceibys, ka tū variešu, jo poša narunoju latgaliski. Šaļtī, kod pruotā īguoja dūma par mandalu gruomotu latgaliski, vaicuoju, voi veirs byutu ar mīru paleidzēt ar tekstim, kai ari, voi jis zyna kaidu, kurs varātu puorsavērt, voi vyss latgaliski ir pīraksteits korekti. Kod sajiemu apstyprynojūšu atbiļdi, zynuoju, ka tū dareišu. Skaitu, ka latgaliski ir puoruok moz gruomotu, i itaidys gruomotys vēļ nabeja nivīnys,” stuosta Kristiāna, kuru volūdys vaicuojumūs gruomotys tapšonys procesā konsultēja portala lakuga.lv redaktore Laura Melne.

Par īspiejom nūpierkt gruomotu var izzynuot “SimplyLove” Instagram i Facebook lopuos.