Rokstu sagataveja: portals lakuga.lv

Dīvamžāļ itei dīna nasuse skumu viesti – vakar, 7. novembra, vokorā piec smogys slimeibys myužeibā nūguojs izcylais gleznuotuojs, Latvejis Muokslys akademejis emeritus profesors, ilggadejais Rēzeknis Muokslys i dizaina vydsškolys direktors, Treju Zvaigžņu ordiņa viersinīks Osvalds Zvejsaļnīks. Ziņa publicāta Rēzeknis muokslys i dizaina vydsškolys profilā socialajā teiklā “Facebook” itymā reitā.

Gleznuotuojs, školuotuojs i procesu vierzeituojs – tai var saceit par Osvaldu Zvejsaļnīku (Zvejsalnieku). Dzims 1944. gods 21. martā Varakļuonūs, audzs Rēzeknis nūvoda Zvejsolā, bet vaira nakai 50 godu par sovu sātu saucs Rēzekni. 1971. godā beidzs Latvejis Muokslys akademeju (LMA), nu 1976. gods bejs Latvejis Muokslinīku savīneibys bīdrys. Nu 1970. gods struodojs Rēzeknis lītišķuos muokslys vydsškolā, garus godus bejs Rēzeknis Muokslys i dizaina vydsškolys direktors, LMA profesors. Muokslinīks izstuodēs pīsadalejs nu 1971. gods, sareikuojs ap 20 personalizstuožu, regulari pīsadalejs plenerūs i grupu izstuodēs kai Latvejā, tai uorvaļstīs. Leidz pat myuža golam bejs aktivs gleznuotuojs i vēļ 2021. godā par dorbu “Rudens vēji” sajiems Jāzepa Pīguožņa bolvu Latvejis ainavu glezniecībā.

Pasasokūt Osvalda dorbam Rēzeknē ir vīna nu lobuokūs muokslys vydsškolu Latvejā, nūdybynuota vīneiguo Latvejis Muokslys akademejis filiale uorpus Reigys, kas ir pamats vasalai muokslinīku paaudzei Latgolā, sataiseits Rēzeknis muokslys noms ar vīneigū pastuoveigū Latgolys muokslinīku dorbu ekspoziceju pasaulī.

Osvalds Zvejsaļnīks bejs pīminekļa “Vienoti Latvijai” (tautā saukta “Latgolys Muora”) atjaunuošonys dorbu vadeituojs, Latvejis atmūdys vierzeituojs Rēzeknē, Latgolā. 2019. godā Zvejsaļnīks sajiems ari Latgalīšu kulturys goda bolvu “Boņuks” par myuža īguļdejumu latgalīšu kulturys atteisteibā.

Izsokam leidzjiuteibu muokslinīka tyvynīkim, bejušajim kolegim i juo muokslys meiļuotuojim! Kūšūs kruosu i boltūs bazneicu Latgola, kas īmyužynuota Osvalda dorbūs, paliks mums iz vysu laiku.