Rokstu sagataveja: portals lakuga.lv

Turpynojūt septembrī aizsuoktū tradiceju, grupa “Bez PVN” šudiņ, 8. novembrī, publiciejuse jaunu dzīsmi, kura reizē ir veļtejums ari tyvajim Latvejis vaļsts svātkim. Dzīsmē i videoklipā “Skaidys” grupa “Bez PVN” sasadorboj ar čellistu Valteru Pūci. Reizē ar dzīsmi izludynuots ari jaunuo albuma “Paraleli horizonti” prezentacejis koncerts, kas paradzāts cyta gods 18. martā Latgolys viestnīceibā GORS.

Dzīsme “Skaidys” ir pyrmuo grupys dzīsme, kurā, kai atsazeist poši grupys daleibnīki, īsaskaņ sorkonboltsorkonuo nūkruosa. “Dzīduot latgaliski ir ari dzīduot latvyski. Mes asam sovys zemis patrioti!” tai grupys daleibnīki, prezentejūt dzīsmi, itūreit saceja LTV1 raidejumā “Rīta Panorāma”. Dzīsmis teksta i muzykys autors Kristaps Rasims vielej: “Kaids saceis – cik moza mums tei Latveja. Mes saceisim – Latveja ir cik lela, cik leli asam mes poši! Augom, augam, augsim!”

“Skaidys” tapuse sadarbeibā ar grupys “DAGAMBA” čellistu Valteru Pūci, dzīsmei sataiseits ari videoklips. Dzīsmis videoversej taisejs Ivars Utināns, teksta video grafikys – Viola Lapa. “Skaidys” īraksteita studejā “Hodila Records” pi Girta Laumaņa i studejā “Reiga”, bet dzīsmis miksa i mastera apstruodis taisejs Armands Treilihs.

Jaunys dzīsmis publiciešona kotra mieneša 8. datumā suocēs septembrī ar dzīsmi “33”, pasaturpynuoja oktobrī ar “Batuts”, bet jaunuo dzīsme novembrī “Skaidys” ir trešais publicātais skaņdorbs. Grupa atkluoj, ka itys vyss nūvess iz grupys jaunuo albuma “Paraleli horizonti” prezentacejis koncertu, kas paradzāts cyta gods 18. martā Latgolys viestnīceibā GORS Rēzeknē. Koncerta beletus var jau nūpierkt ITE.

Koncertā “Paraleli horizonti” grupa apvīnuos sova jaunuokuo studejis albuma prezentaceju ar dzīšmu vysaida veida interpretacejom. Koncertā uzastuos ari cyti gosti i “Bez PVN” draugi. Jaunajā albumā byus apkūpuotys kovida īrūbežuojumu i sātā siediešonys laikā pīdzymušuos “Bez PVN” dzīsmis. Īprīškejais lelais grupys koncerts taišni Latgolys viestnīceibā GORS izskanēja 2019. goda oktobrī. Tū var nūsavērt ITE.

Grupā “Bez PVN” dorbojās: Kristaps Rasims (bolss, elektriskuo gitara), Guntis Rasims (bolss, akustiskuo gitara), Juris Vucāns (bolss, elektriskuo gitara, tausteni), Valdis Vucāns (basa gitara) i Normans Bārbals (bungys).