Rokstu sagataveja: portals lakuga.lv

Grupa “Dabasu durovys” publiciejuse Zīmyssvātku dzīsmi “Zīmys svātku nakts”, kas īraksteita kūpā ar jaunū dzīduotuoju Lauru Svikšu. Dzīsmis vuordu autors ir Ontons Skrynda, bet muzykys – Aņss Ataols Bierzeņš. Taipat reizē sovu “Zīmys svātku nakts” verseju pīduovoj ari tuos autors Aņss Ataols Bierzeņš.

“Dabasu durovu” liders Arņs Slobožanins stuosta, ka itū dzīsmi pyrmūreiz izdzierdiejs pārņ koncertā “Celīs, bruoļ!”, kas nūtika Latgolys viestnīceibā GORS. Tī tū dzīduojs dzīsmis muzykys autors Aņss Ataols Bierzeņš. Sovpus dzīsmis tekstu Aņss pajiems nu īvārojamuo latgalīšu atmūdys darbinīka, uorsta Ontona Skryndys dzejūļa, kas publicāts ari 1914. godā izdūtajā pyrmajā latgalīšu dzejis antologejā “Kūkle”. Arņs Slobožanins atguodynoj, ka juo aizaraušona niu ir Dīnavydlatgola, partū jam ruodejīs svareigi īraksteit ari kaidu dzīsmi ar nu tuos pusis guojušuo Skryndys vuordim.

Dzīsmis īroksts eipašs ari ar tū, ka tymā pīsadalejs pats pyrmais “Dabasu durovu” bundzinīks Ēriks Priluckis, kurs īt nu Osyuna. Jis atbraucs gostūs i pīduovuojs Arņam koč kū muzykalu kūpā sataiseit. Tai Ēriks ar Arņa paleidzeibu radejs aranžeju dzīsmei “Zīmys svātku nakts”. Pīsadaleit īrokstā paaicynuota ari jaunuo dzīduotuoja Laura Svikša nu Viļānu, kura beidzamajā laikā vys aktivuok pīsoka sevi Latvejis muzykys pasaulī.

Arņs soka, ka itei dzīsme ir kai puorsteigums i nalels Zīmyssvātku breinumeņš, partū ka tūs skaņdorbus, kū varēs dzierdēt jaunajā “Dabasu durovu” albumā, kas izīs cytugod, jis tur nūslāpumā. “Zīmys svātku nakts” ari nabyus tymā dzierdama.

Sovpus Aņss Ataols Bierzeņš dzīsmi sarakstejs jau 2019. godā, kod Kolupa puišu vokalajam ansambļam “Čvartaks” vajadzēja latgalīšu Zīmyssvātku dzīsmis deļ pogosta pasuocīņa, tok izaruodeja, ka taidys nav. Tai Aņss atroda Skryndys (aba Leidumnīka, kai jis parakstejs itū dzejūli) tekstu i pīraksteja sovu dzīsmi.