Rokstu sagataveja: portals lakuga.lv

Taišni pyrma goda viestejom, ka Bolvu nūvoda pošvaļdeiba pi ībraukšonys sova nūvoda teritorejā 2021. gods novembrī ir pastatejuse ceļa zeimis obejūs latvīšu volūdys paveidūs – sūpluok uzrokstam latvīšu literarajā volūdā “Balvu novads” ir ari nūsaukums latgalīšu rokstu volūdā “Bolvu nūvods”. Itūgod ari Preiļu nūvoda pošvaļdeibys deputati ir atbaļstejuši taida poša veida zeimu pastatiešonu, respektivi, uzrokstam “Preiļu novads” sūpluok ir “Preiļu nūvods”. Apvaicuojom ari cytys Latgolys pošvaļdeibys i raudzejom dazynuot, voi vēļ kaidā teik plānuots izvītuot ceļa zeimis latgaliski.

Vārts atguodynuot, ka pyrmī calmlauži, kas aizsuoka ceļa nūruožu īvīsšonu latgaliski beja tūreizejais Kuorsovys nūvods (niu atsarūn Ludzys nūvodā). Vēļ 2014. godā Kuorsovys nūvoda pošvaļdeibā tyka eistynuots pyrmais projekts “saREDZI latgalīšu volūdu”, kam sekuoja vairuoki cyti leidzeigi projekti, pasasokūt kurim, īlu nūruodis latgalīšu volūdā ir pastateitys ari Kuorsovys nūvoda pogostu apdzeivuotajuos vītuos. Svareigi atzeimēt, ka tūreiz Kuorsovys nūvoda pošvaļdeiba sajēme vairuokys izvārstys viestulis nu Vaļsts volūdys centra ar aicynuojumu zeimis latgalīšu rokstu volūdā nūjimt, vystik jau tūlaik taidam aicynuojumam nabeja juridiska pamata. Sovpus niu latgalīšu volūdys statuss ir vēļ vaira nūstyprynuots ar pārnejuo gods vosorā pījimtū Latvīšu viesturiskūs zemu lykumu, kas vaļsts i pošvaļdeibu īstuodem nūsoka par pīnuokumu nūdrūsynuot latgaliskuos identitatis i kulturviesturiskuos vidis saglobuošonu i ilgtspiejeigu atteisteibu. Itūs pīnuokumu vydā ir veicynuot latgalīšu volūdys lītuošonu publiskajuos nūtikšonuos i kasdīnys dorbā, kai ari atjaunuot i vidē izmontuot vītvuordus latgalīšu volūdā, tymā skaitā ceļazeimēs, vītu i īlu nūsaukumūs.

Apvaicojūt cytys Latgolys pošvaļdeibys, tyka sajimtys dažaidys atbiļdis, vystik dīvamžāļ nīvīna nu pošvaļdeibu itūšaļt naplānoj īvīst ceļa zeimis ari latgalīšu rokstu volūdā. Par pīmāru, atbiļde nu Daugovpiļs: “Da ituo pošvaļdeibys Piļsātplānuošonys i byuvnīceibys departamentā nav sajimti īrūsynuojumi i nav nūtykuse apsprīsšona saisteibā ar piļsātys rūbežzeimu uzrokstu papyldynuošonu latgalīšu volūdā.” Varakļuonu nūvoda pošvaļdeiba atbiļdeja: “Varakļuonu nūvoda rūbežs piec Administrativi teritorialuos reformys nav mainejīs, leidz ar tū nav maineitys i nateik plānuots maineit ceļa zeimis.”

Portals lakuga.lv veice aptauju socialajūs teiklūs Facebook, Instagram i Twitter, sovim sekuotuojim vaicojūt, voi jī atbolsta zeimu latgaliski pastateišonu. Instagram sekuotuoji 100% atbolsta taidu zeimu īvīsšonu, cikom nu portala Twitter lītuotuoju – 80%.

Taipat sovim sekuotuojim vaicuojom, kuruos tod pošvaļdeibuos zeimis latgaliski byutu vajadzeigys. Daļa lītuotuoju atbiļdēja, ka taida veida zeimem juobyut vysuos pošvaļdeibuos, tok izskanēja ari Ludzys nūvods, Rēzeknis nūvods, Augšdaugovys nūvods i cytu pošvaļdeibu teritorejis.

Daugovpiļs pošvaļdeibys atbiļdē saceits, ka “nav sajimti īrūsynuojumi” par jaunu ceļa zeimu pastateišonu latgalīšu rokstu volūdā. Deļtam, īspiejams, pošu dzeivuotuoju piļsūniskuos iniciativys i īrūsynuojumu īsnēgšona sovā pošvaļdeibā var koč drupeit īkustynuot itūs vaicuojumu izskateišonu.