Rokstu sagataveja: portals lakuga.lv

Sajamūt AS “Latvijas valsts meži” mierkzīduojumu 30 000 eiro apmārā, ari itymā vuiceibu godā teik eistynuots pilotprojekts “Latgalīšu rokstu volūda Latgolys školuos”. Pilotprojekta eistynuotuoji ir Latgalīšu volūdys, literaturys i kulturviesturis školuotuoju asociaceja (LVLKŠA), i finansejums teik apgiuts caur Vaļsts Kulturkapitala fondu, informej LVLKŠA puorstuove Veronika Dundure.

Itūgod projektā pīsadola 17 školys nu Augšdaugovys nūvoda (Špogu vydsškola), Bolvu nūvoda (Baļtinovys, Rekovys, Ruguoju, Viļakys vydsškolys, Bierzpiļs i Eglainis pamatškolys), Ludzys nūvoda (Cyblys vydsškola, Ludzys piļsātys vydsškola, Ludzys Muzykys pamatškola), Kruoslovys nūvoda (Kruoslovys Vaļsts gimnazeja), Preiļu nūvoda (Rībeņu vydsškola), Rēzeknis nūvoda (Bieržgaļa pamatškola, Drycānu vydsškola, Nautrānu vydsškola) i nu Rēzeknis piļsātys (Rēzeknis 5. pamatškola, Rēzeknis Vaļsts 1. gimnazeja).

Nūdarbeibys nūteik reizi nedeļā, 20 školuotuoji voda puļceņu nūdarbeibys 233 školānim vysaiduos vacuma grupuos nu 1. leidz 12. klasei. Interese itūgod par vareibom vuiceit latgalīšu rokstu volūdu pīauga, i projektā īsasaisteja Eglainis pamatškola, Drycānu vydsškola i Ludzys Muzykys pamatškola. Školuotuojim teik organizāti seminari kotru mienesi, projekta metodiki konsultej i individuali. Školuotuoji izstruodoj sovus tematiskūs plānus, izmontojūt LVLKŠA izstruoduotūs programu paraugus (daīmami ITE i ITE). Taipoš školuotuoji turpynoj veidot dorba lopys, tematiskuos krystvuordu meiklis, videosižetus, biļžu vuordineicys i cytus metodiskūs materialus, organizej viktorinys i konkursus. Par pīmāru – Ludzys piļsātys vydsškolys školuotuoja Ineta Misāne ar školānim izveiduoja animacejis kinu “Kačeiša patmalis”. Školuotuoji sovus audziekņus sagatavuos jau 23. skotuvis runys konkursam “Vuolyudzāni” i 22. vaļsts atkluotajai olimpiadei latgalīšu rokstu volūdā i kulturviesturē, kas parosti nūteik aprelī, tai par projektu stuosta LVLKŠA puorstuove Veronika Dundure.

Portals Lakuga.lv sasazynuoja ar vairuokim školuotuojim, kuri vuica latgalīšu rokstu volūdu, kab dazynuotu, kai veicās ar programu eistynuošonu, kaidys ir jūs kūpejuos sajiutys par bārnu gribiešonu vuiceitīs latgalīšu volūdu i kaidi ir ituo dorba leluokī izaicynuojumi.

Annele Slišāne Viļakys vydsškolā vuica 3.-5. klasi, grupeņā videji ir 17-20 bārnu

“Viļakys gimnazejis direktore mani uzaicynuoja paraudzeit vuiceit latgalīšu volūdu, mes sasatykom, apsprīdem itū ideju, i es pīkrytu. Ar bārnim iz reizis vīnuojomēs, ka es runuošu tik latgaliski, ka byus kaidys naskaidreibys, drūsai dreikstēs vaicuot. Vuicu piec standarta vuiceibu materiala, kur temys “apaug” vīna ar ūtru. Suokam ar sevi – kai sauc, kur vuicuos, kaidys ir sovys interesis, tod īmam uorā nu dvora aba sātys. Iz tafelis ari rokstu vuordus kai latgaliski, tai i latvyski, kab var saleidzynuot. Kotram bārnam ir ari sova “Latgalīšu rokstu volūdys gruomota”, tamā bārni ari saroksta vysu par sevi pa vysom temom. Pavasarī brauksim pa muzejim, kab apsavērt kulturviesturiskū namaterialū i materialū montuojumu. Vēļ bārnim cīši pateik grupys “Rupuči” īraksteituos dzīsmis ar Ilzis Spergys tekstu. Leluokais izaicynuojums ir tys, ka bārni sovuos sātuos narunoj latgaliski, deļtam latgalīšu volūda nav jūs kasdīnys volūda, vys ceru, ka goda beiguos mes jau varēsim runuot kūpā latgaliski.”

Olita Truskovska Kruoslovys gimnazejā vuica 3. klasi, grupeņā videji 18-20 bārnu

“Latgalīšu volūdu vuicu jau ūtrū godu, itūgod ir vīgļuok, partū ka niu maņ ir vīna vacumgrupa, var daudz rodūšuok struoduot ar bārnim i veiduot stuņžu temys. Cīši prīcej, ka grupenis bārni cytim stuosta par itom vuiceibom i pakuopeniski īt kluot jauni bārni. Ceņšūs vuiceit na viņ raksteit, tok ari snēgt cytu informaceju, īmam ari rūtaļuos. Ka īprīšk bārni sasavasaluoja viņ latvyski, niu breivi sasavasaloj ari latgaliski, kotrs turpynoj runuot sovā izlūksnē i tys nasaguodoj gryuteibys. Leluokais izaicynuojums – raugu īvīst dažaidys dorba metodis, vuiceit ari padzilinuotuok.”

Elza Mače Nautrānu vydsškolā Rēzeknis nūvodā vuica 6. klasi, grupeņā videji 8 bārni

“Juosoka gūdeigi, ka nu bārnu pusis interese nav cīši lela, drupeit pat saīt pīsaspīsšonys kuortā vuiceitīs. Nazkai redzīs, ka mums nazkod beja leluoka interese par apleicīni i nūtikšonom ap mums, niu bārnu uzvedeibu ir cīši gryuši pīsaisteit. Raugu kasdīnā īvīst vysaiduokus veidus, kai bārnim vuiceit latgalīšu volūdu, vys mozū interesi, īspiejams, vairoj tys, ka cīši daudzi sātā narunoj latgaliski, deļtam tei nav jūs kasdīnys volūda.”

Dace Tihovska Ludzys Muzykys pamatškolā vuica 4. klasi, grupeņā videji 11 bārni

“Grupenis bārni par vuiceibom stuosta ari cytim bārnim, prīca, ka deļtam ari cyti izsacejuši gribiešonu vuiceitīs, cytugod nūteikti raudzeisim bārnu skaitu palelynuot. Patīseibā seņ jau gribieju pamieginuot vuiceit latgalīšu volūdu, vys augustā nasaguoja laiks apmeklēt “Vosoruošonys” nūdarbeibys. Niu ir daudz materialu, kab pats varātu vuiceitīs nakluotīnē škārsteiklā, deļtam sajiemu drūsmi i pīsateiču. Vuiceibom mums ir obligatais tematiskais plans, tok tam ir cīši plašs diapazons, deļtam bārnim pateik, ka nūdarbeibu temys ir dažaidys. Mes rokstom, klausomēs, losom, bārnim ari cīši pateik audiopuorsokys. Vēļ bārnim cīši pateik, ka ir vītejī cylvāki ar kurim var parunuot i par kurim es varu pastuosteit, taidys kai vītejuos autoritatis – “Latgalīšu reps”, grupa “BezPVN”, Latgolys rakstnīki. Juopīzeist gon, ka reši kurs bārns sovā sātā ari runoj latgaliski.”