Latgolys cylvāku stuosti fotoprojektā “Life stories”. Saruna ar Olegu Gleizdānu
Intervejis autore: Amanda Anusāne, portals lakuga.lv
Pyrma kaida laika Instagram pasaruodeja jauns konts ar nūsaukumu “Life stories”, kurā teik publicātys biļdis ar cylvākim godūs Latgolys laukūs. Fotografeju autors ir Olegs (Oļegs) Gleizdāns, kurs vaira zynoms kai kuozu i ainovu fotografs BucisPhotography, juo portfolio var apsavērt kai Facebook, tai Instagram i līgavām.lv. Instagram kontā @lifestories_of_grace var na tik apsavērt vysaiduoku personažu biļdis, tī ari ir vareiba īpasazeit ar cylvāku stuostim. Pagaidom tiemejam iz biļdem virtuali, tok turim nūceju, ka piec kaida laika fotografejis varēsim apsavērt ari izstuodē tepat Latgolā. Kab izzynuotu vaira par itū fotoprojektu, aicynojom Olegu Gleizdānu iz sarunu.
Tu esi fotografs nu Ludzys, kai aizsuoki projektu “Life stories”?
Nui, fotografeju jau vaira kai 10 godi, i muna dzymtuo piļsāta ir Ludza. Piec školys studieju Reigā, beju ari uorzemēs, tod kaidu laiku padzeivuoju Jelgovā, kur ari fotografieju cylvākus itam projektam. Nu vyspuor itū projektu aizsuoku Marokā. Ceļuojumi kolnu cīmatūs mani īdvesmuoja biļdēt, es ari īsadvesmuoju nu dažu portretu fotografu, par pīmāru, Lee Jefries, kurs Anglejā biļdej i braukoj pa vysu pasauli, biļdeidams bezpajumtnīkus i dažaidus cylvākus ar sovu dzeivis stuostu, jis ari ir muns meiluokais portretu fotografs. Itys vyss mani pavylka biļdēt.
Tu sateic cylvākus, kurūs biļdei itam projektam, voi jī sateik tevi?
Jezups nu Latgolys maņ ceļā pasatruopeja najauši. Es brauču biļdēt ainovys, beja agrys pavasars, apreļs, pi Zylupis beja nazkaids lauku cīmateņš, ka nasamoldūs – Peroļu cīms. Pīstuoju kolnā i nazkas ar mani nu mugurpusis bolsā vasalojās: “Vasals, vasals, pyrmuo mašyne pa nedeli atbraukuse.” Maņ cīši nabeja laika, beja taišni saulrīta breids i es jam soku: “Atbraukšu piec puora dīnu, vajag nazkū atvest, kaidu puortyku, tabaku?” “Nui, kū atvessi, tys byus labi, nu golvonais pajem pretsuopu zuolis!” jis maņ soka. Tai es aizbrauču, tok piec diveju dīnu nūdūmuoju, ka juonūbrauc pi tuo onkuļa, ībrauču Ludzys veikalā, sapierku vysaidu puortyku, banku ar Ibumetin i aizbrauču da juo. Pyrmū reizi nūbeju tī treis stuņdis, cikom jis maņ izstuosteja sovu stuostu, cikom īsapazynom, cikom jis atsavēre i mes sasadraudziejom. Jis īdzēre nazkaidu bryuviejumu. Pyrmajā reizē es nabiļdieju jū. Atbrauču vēļ vīnu reizi, tod es jū sabiļdieju, jis palyka maņ par draugu, praseja atvest tū i tū. Itys ir vīns nu stuostu, kod es najauši satīku cylvāku.
Saīt, ka caur itū projektu piļdi ari socialū funkceju?
Eisti nā, ite tik daži taidi gadejumi, daudzi nu tūs cylvāku nikuo naprosa i es vīnkuorši jim par pateiceibu atstuoju kaidu soldonumu.
Tod kai tu sateic tūs puorejūs personažus i kai nūteik biļdiešonuos process?
Ar kotru ir sovs stuosts, nav tai, ka es speciali braucu meklēt, asu pats īraudzejs voi satics. Ir cylvāki, kuri īsoka sovys babys, sābrus, nu nav tai, ka es kotru ari biļdeju. Es aizbraucu, apsaveru – ir atvārti cylvāki, ir cylvāki, kuri daguna golā aizcārt durovys, jo dūmoj, ka es asu nazkaids žurnalists i likšu jūs žurnalā, cytam ir īsasakņuojuse baile nu padūmu laiku – ka jū biļdej, taitod nazkū nu juo gryb. Tam vysam vajag laiku, kab paskaidruotu kam vajadzeigys biļdis, kab aprostu. Es jim stuostu, ka es deļ sovys kolekcejis, ka veiduošu izstuodi par Latgolys cylvākim, vīnsātom, sādžom. Suokumā ir sarunys par dzeivi, es izprosu, ar kū tys cylvāks nūsadorbuojs, kaids ir juo stuosts, tod jau pīkūdynoju biļdētīs, ar taidim nūsacejumim, ka ari atvesšu kaidu biļdi jim pošim taustamā veidā, asu pat iz e-postu vīnai taņtei syutejs, jai ari internets ir i sātā poša verās, jai tī laikam meita paleidz. Puorsvorā vysi ir voi nu zemnīki, voi prostī ļauds. Ir divejis taņtenis, kurys atbraukušys nu Reigys iz vacuoku sātu. Vīna Nierzā 86 godūs audzej vuškys. Sejā radzams, ka vysu dzeivi struoduojuse. Ūtra audzej vystys. Ar vysim ir atrosts kontakts, nav tai, ka jim ir pretreakceja biļdētīs. Nu suoku juos nūbiļdeju saimnīceibys dorbūs, kai baroj dzeivinīkus i tai, tod jau biļdeju tyvūs portretus. Dažreiz saīt tai, ka es aizbraucu i nikas nu biļdiešonys nasaīt – voi nu kaids nūdziņs buorzdu voi naizaver tai, kai gribīs, es jim vysu laiku soku – nasapucejit! Svareiga ir ari gaisma.
Tu ar laiku plānoj veiduot izstuodi, na tik publicēt kartenis socialajūs teiklūs?
Instagram kontu @lifestories_of_grace izveiduoja i uztur muna sīva, maņ nav tam laika. Jei poša ir kuozu vadeituoja, roksta rokstus ligavam.lv, jai tys ari labi saīt. Runojūt par izstuodi, nui, maņ ir plans. Pagaidom apstruodoju vēļ asūšū materialu. Taidu cylvāku, par kurim varātu izveiduot stuostu, maņ ir kaidi pīci. Ir ari taidi, par kurim nikū eisti navaru pastuosteit, taidi, kurus asu nūbiļdiejs najauši. 80% nu itūs cylvāku ir Latgolā dzeivojušī, ir ari daži jelgovnīki. Dūma par izstuodi maņ beja jau seņ, bet ir problema atrast cylvākus, kuri uzrunoj, taidus koloritus, ar dzeivis grumbom sejā i tai. Itys projekts valkās jau kaidi pīci godi i es navaru jū pabeigt, partū, ka vosorā ir kuozu sezona, leidz decembram maņ juoapstruodoj vyss materials. Ir moz breižu, kod var izaraut, tok goda laikā plānoju uztaiseit izstuodi nu kaidu 20 biļžu, kur byus 10 portretu tyvplani i 10 biļdis ar jim darbeibā sovā saimnīceibā, dobys ainovā voi kai cytaiž, kab nūsalosa Latgolys sajiuta. Biļdis byutu kruosainys i malnboltys.
Tu jau zyni, kur tū grybātu izstuodeit?
Es dūmoju, ka Latgolys viestnīceibā GORS varātu. Maņ pīduovuoja ari dažys vītys Reigā i Siguldā.
Voi iz izstuodi aicynuosi ari personažus, kurus biļdieji?
Pusis nu jūs vaira nav, bet ir daži, kurus vēļ padūmā biļdēt, varbyut varātu.
Tu esi pylna laika fotografs, kas ir tys, kū tev vysbīžuok saīt biļdēt i kas ir tys, kū vysvaira pateik?
Kuozys. I vysbīžuok saīt i pateik, jo maņ pateik izbaudeit tū dīnu, kod redzi laimeigus cylvākus, kuri gatavojās sovam prīceiguokajam dzeivis nūtykumam. Tys aizraun.
Kai ir piec tim prīceigajim breižim redzēt tūs natik prīceigūs projektā “Life stories”?
Es itūs skotus daudz asu redziejs bierneibā, maņ tys nav nikas naparosts. Jī mož taidi nalaimeigi izaver biļdēs, jo es tī raugu paruodeit maksimali tū dzeivis gryutumu.
Par tū tu esi izavieliejs taidu biļžu apstruodi?
Nui, malnboltuos biļdis ir taidys dryumuokys. Es asu izcieļs grumbys, dzydrynuojs acs, palelynuojs kontrastu, lics dažaidus sluoņus.
Kurs ir vysinteresantuokais stuosts?
Ir treis stuosti, kurus varātu izceļt:
Jezupu, par kuru jau stuosteju, es asu biļdiejs i ar jū kontaktiejīs vysvaira, tok jis jau ir mirs. 2017. godā jis maņ tūreiz izguoja iz ceļa. Sāta, kurā jis dzeivuoja, izavēre tai, kai pieckara laikūs. Juo sāta 70. godūs nūdaga, jam atļuove padzeivuot blokus sātā. Kūpumā jis nūsiedēja cītumā 53 godi, 2013. godā jis tik izguoja uorā nu cītuma. Siedēja Krīvejā nazkur pi Uralu, tyka uorā, otkon sadareja glupeibys, tod otkon jū īlyka cītumā i tai iz riņči.
Par Lideju ari var daudz kū stuosteit, jai ir suņs, veirs jai nūmyra pyrma Juoņu, ari beja apmāram 90 godu vacs, kai jei. Lideja jau tod navarēja eisti paīt. Jim sātā ari vyss beja kai piec kara, vyss ūde piec dyumu. Jai laikam ir vīna meita, kura eisti nasalīk ni zinis par jū, tī atsevišks stuosts. Lideja kotru reitu mūstās ar vaicuojumu sev, par kū jei vyspuor ir pīsacāluse.
Jei dzeivuoja Cyblys nūvodā, niu jei jau ir aizsyuteita iz pansionatu, i muna bejušuo školuotuoja nu Cyblys vydsškolys, kod es ituos tantis biļdi īlyku Facebook, atsyuteja itaidu viesti:
Ite radzama vušku taņte Zinaīda, kura pyrma 15 godu puorsacēle nu Reigys iz laukim Raipolē, kab vacuoku sāta napalyktu tukša. Juos kasdīna paīt storp dorbim i hobiju. Jei meiļoj dorbu, cylvākus i dzeivinīkus.
Tev pošam ir vacvacuoki, jūs ari biļdej voi esi biļdiejs?
Nā, vacvacuoku nav. Sovu babu, kura nūmyra pyrma divi godi, es napaspieju sabiļdēt, bet vajadzēja, nabeju da tam aizadūmuojs.
Kas tod tys ir par žanru itom fotografejom?
Tys ir žanra portrets par Latgolys cylvākim. Latvejā nivīns tai eisti nabiļdei taidus portretus, tok pasaulī taidu fotografu natryukst, kas, par pīmāru, biļdej bezpajumtnīkus iz īlu i tod drukoj fotogruomotys ar aprokstim par jim. Datryukst laika, kab itū vysu atteisteitu ari Latvejā, kuozu fotografiešona nadaudz aizānoj munu hobiju. Kod sabiļdeju vairuokys tyukstūšys biļžu, tod vaira nikuo nasagryb biļdēt. Pyrma puora godu, kod tik daudz kuozys nabiļdieju, beja vaira laika, niu jau ir izaveiduojs nūgurums.
Tod tu pīkreiti apgolvuojumam, ka nauda traucej hobijam?
Nui, tai ir. Mani agruok breidynuoja, kod es brauču kai asistents taidim fotografim kai Mārcis Baltskars, Līga Pētersone, Jānis Konons, tod Līga maņ saceja: “Verīs, es agruok biļdieju dobu, pučis, dzeivinīkus, niu maņ tam nav laika, jo kuozu fotografeja vysu laiku ir aprejuse.” Tod es tam naticieju, no tagad, kod asu tik daudz par naudu biļdiejs, kod ir juoīsakļaun termiņūs i juostruodoj ar taidu apjūmu, tod tai ir, ka vaira nikuo biļdēt nasagryb. Pa vydu ari ir Zīmyssvātku fotosesejis, fotosesejis uorstim i vysaiduoki cyti projekti. Agruok es vaira biļdieju ainovys i givu dažaidus momentus – myglu, saullāktu. Kod fotografiešona puorsavierš par naudys olūtu, tod tai nūteik.
Izaklausa, ka tev eistyn nav laika, tok voi esi jau dūmuojs par kaidim cytim itaida veida projektim?
Cik maņ jau byus tuo laika, es nūteikti turpynuošu atruodeit cylvāku dzeivis. Pyrma juopabeidz itys projekts. Dobu jau taipat es ik pa laikam uzbiļdeju.
Tu biļdej Latgolys cylvākus, nu kas tev pošam ir Latgola?
Latgola ir muna dzimtine. Pa munam, Latgolys lauki atsaškir nu lauku cytūs nūvodūs. I sātys, kurys nav vaira tik daudz nimoz ari palykušys. Niu jau zemis zvīdrim puordūtys i daudz kas nūleidzynuots. Ari lauku cylvāki, kurus niu tī gryuši atrast, nav tai, kai pyrma godu desmit, kod es vēļ nimoz jūs nabiļdieju, dūmoju, ka suoktu tymā laikā, tod byutu savuocs lelu arhivu ar dažaidim personažim. Zīmā meža vydā vacumdīnuos jau napadzeivuosi, ni tī var datikt kaids, ni tī kas tyvuokajā radiusā atsarūn.
