Rokstu sagataveja: portals lakuga.lv

Namaterialuos kulturys montuojuma centrs “Upīte” izsludynuojs Ontonam Slišānam veļteitu rodūšūs dorbu konkursu, kurā aicynuoti pīsadaleit kai školāni, tai ari pīaugušī. Kai informej centra direktors Andris Slišāns, konkursa mierkis ir aplīcynuot pīdareibu i mīlesteibu sovam dzymtajam nūvodam i styprynuot latgaliskū kulturidentitati. Itūgod konkursa īdvesmis olūts ir Ontona Slišāna puorsokys, kurys piec atmiņu stuostu pīrakstejuse Mārīte Slišāne.

Kai īrosts, konkursam var īsyuteit sovus rodūšūs dorbus divejuos kategorejuos: raksteitūs dorbu voi zeimiejumu. Raksteitūs dorbu konkursā itūgod juoīsnādz pošsacarāta puorsoka, īsadvasmojūt nu Ontona Slišāna puorsoku, ar kurom var īpasazeit ITE. Ari zeimiejumu konkursa dalinīki aicynuoti īsadvasmuot nu Ontona Slišāna puorsoku i izstruoduot dorbu A3 formatā gleznīceibys (guaša, akvareli, ellis kreiteni) tehnikā. Dalinīki var pīsadaleit kai obejuos konkursa kategorejuos, tai tik vīnā, kai ari īsnēgt naīrūbežuotu skaitu dorbu.

Dorbi juoīsnādz da 6. apreļam, syutūt pa postu („Rodūšūs dorbu konkurss” Namaterialuos kulturas montuojuma centrs „Upīte”, Akas laukums 1, Upīte, Škilbānu pogosts, Bolvu nūvods, LV-4587) voi izmontojūt pakomatus, voi īsnādzūt tūs Upītis bibliotekā. Rokstu dorbus var īsnēgt ari, syutūt iz e-postu: upites.muzejs@gmail.com.

Nūslāguma pasuokums i uzvarātuoju apbolvuošona paradzāta 2023. gods 16. majā Upītē.

Vaira informacejis par konkursu var izzynuot tuo nūlykumā ITE.

Vaira par Ontona Slišāna puorsokom var puorskaiteit ITE.