Roksta autore: Lidija Soldāne, Daugovpiļs Centra vydsškolys bibliotekare

Lai cik paradoksalai tys nabyutu, daugovpilīšu dzymtuo nūvoda volūdu Daugovpilī dzierd dyžan reši, leluokuo daļa piļsātnīku tū pavysam nasaprūt, deļtuo ir apgryutynuota ari Latgolys kulturys saprasme. Voi tai tam ir juobyut? Redzīs, ka nā. Lai itū viesturis gaitā pīlaistū klaidu koč cik lobuotu, jau trešū godu piec kuortys Daugovpiļs Centra vydsškolā, kas ir cyttautu škola, Dzymtuos volūdys dīna ir veļteita latgalīšu volūdai i kulturai.

2021. pandemejis godā školys sātyslopā vysim, kam interesej, beja pīduovots tests par latgalīšu volūdu i kulturu, sovpus 2022. godā, sasadorbojūt latvīšu volūdys školuotuojai D. Aizpurītei i bibliotekarei L. Soldānei, beja pīduovuota vareiba īpazeit latgalīšu volūdys “Puordzeivis minimumu skūlānam”, tys ir, sasavasaluošonys frazis i ar školys kasdīnu saisteitus vuordus. Pasuokuma daleibnīki ar lelu aizrauteibu i ceņteibu atkuortuoja audioīrokstā dzierdātūs vuordus (tys beja itam pasuokumam speciali īrunuots). Nūdarbeibā školāni na tik runuoja, bet i dzīduoja latgaliski. Daudzi pajēme sataiseituos dorba lopys kai cīmakukuli iz sātu, lai kūpā ar vacuokim paraudzeitu runuot latgaliski.

Ari itūgod nu 20. leidz 24. februaram ir plānuots turpynuot īprīškejā godā aizsuoktū, vacuokajom klasem tiks pīduovuota “Dzīsmu vierne”, kurā jaunīši klauseisīs dzīsmis latgalīšu volūdā, struoduos grupuos, raudzeis atpazeit dzīduotuoju, nūsaceit dzīsmis stylu i viestejumu. Pasokuma beiguos jī nūbolsuos par sev teikamuokū dzīsmi i, kūpā dzīžūt latgaliski, pamess zāli. Jaunuokuo i videjuo pūsma klasem byus “Latgalīšu volūdys puordzeivis minimums”, kurā turpynuos vuiceitīs izrunuot i īgaumēt latgalīšu vuordus, dūmuos i sprīss par nūteikūšū latgalīšu volūdā, kulturā i sabīdreibā.

Juopīzeist, 2021. godā cīši daudzi školāni atbiļdēja, ka jī par latgalīšu volūdu zyna teoretiski, bet tik itamā nūdarbeibā tai pa eistam sasaskuore ar tū pyrmū reizi. Tys jim beja atkluojums! Izarod, ka izrunuot latgalīšu volūdys vuordus nav nimoz tik vīnkuorši, bet tys ir interesanti. Daudzi nu jūs piec pasuokuma sātā pat beja suokuši taidu kai izpieti, voi kaidi radinīki, draugi i sābri ir latgalīši i muok runuot latgaliski. Nūdarbeibu laikā raudzejom rast atbiļdi uz vaicuojumu: “Deļkam Daugovpilī, Latgolys leluokajā piļsātā, nivīna īla nav nūsaukta kaida īvārojama latgalīša vuordā? Voi tū vajadzātu lobuot?”

Nacarātai lels pīsacejumu skaits jau pyrmajā pasuokuma izsludynuošonys dīnā līcynoj par tū, ka īprīškejūs godu pasuokumi ir izraisejuši interesi, deļtuo aizsuoktū latgalīšu volūdys i kulturys populariziešonu vajag turpynuot.