Rokstu sagataveja: portals lakuga.lv

Kam juobyut, kab jaunīši dzeivuotu i grybātu dzeivuot Latgolā? Atbiļdis iz itū vaicuojumu Rēzeknē, 8. aprelī, diskusejā ar jaunīšim i dažaidu sferu puorstuovim – radejis personeibu Lauri Zalānu, Saeimys deputati Leilu Rasimu, uzjiemieju Oskaru Maculeviču, sabīdryskū aktivistu Sandi Mesteru i studentu puorstuovi Sandi Promu – raudzeis aktualizēt latgalīšu kulturys kusteiba “Volūda”.

Sastdiņ, 8. aprelī, 12.00 stuņdēs Latgolys viestnīceibā GORS nūtiks jaunīšu izaugsmis i Latgolys izzynuošonys programys “LTG tu dū!” atkluošonys pasuokums, par reizi piec kura 13.00 stuņdēs sevkurs interesents aicynuots byut kluotyn gūdeigā diskusejā ar jaunīšim i dažaidu sferu puorstuovim par tū, kam juobyut, kab jaunīši niu dzeivuotu i grybātu dzeivuot/atsagrīzt Latgolā? Diskusejā “Kam juobyut, kab byutu ite?” kai eksperti aicynuoti pīsadaleit – radejis personeiba, influencers i jūku meistars Lauris Zalāns, 14. Saeimys deputate Leila Rasima, Rēzeknis Tehnologeju akademejis studentu pošpuorvaļdis aktivists Sandis Proms, KUUP kopejis grauzdātovys saiminīks Oskars Maculevičs i sabīdryskais aktivists Sandis Mesters.

Diskusejis pyrmajā daļā tuos eksperti tiks aicynuoti pasadaleit ar sovu redzīni i pīredzi, atbiļdēt iz vaicuojumim, bet ūtrajā daļā paradzāts dorbs grupuos vysim kluotyn asūšajim, kab kotrā nu ekspertu puorstuovātūs sferu – kultura, politika, uzjiemiejdarbeiba, sabīdryskuo īsaiste i izgleiteiba – dabuotu vīnu golvonū atbiļdi iz diskusejis pamata vaicuojumu, kas tod ir vajadzeigs, kab jaunīši grybātu dzeivuot i dareit Latgolā.

Aktiva jaunīte Latgolā i latgalīšu kulturys kusteibys “Volūda” puorstuove Amanda Anusāne soka: “Dzeivoju Latgolā, jo maņ ite ir vyss, kas vajadzeigs dzeivei – sāta, saime, dorbs, īspiejis, tok vysim tys tai nav. Logiski, ka jaunīši piec školys pabeigšonys vysod ir izvielis prīškā, kur studēt, kū dareit tuoļuok, kas lelā daļā gadīņu saīt ar puorsaceļšonu uorpus regiona i piečuoku naatsagrīzšonu. Tok kūpā ar pošim jaunīšim i cylvākim, kuri ir aktivi kotrys sovā sferā, gribim vēļ i vēļ aktualizēt tuos lītys, kas ir vajadzeigys jaunīšim Latgolā, kab ite grybātu byut i dzeivuot. Tik atguodynojūt par tom sev, sabīdreibai, medejim i politikys vierzeituojim i aktivi raugūt dareit, kab vyss vajadzeigais byutu, var dabuot kaidu rezultatu. Regionā ir cīši daudz problemu i izaicynuojumu taišni jaunīšim aktualūs vaicuojumūs, deļtuo – gūdeigā sarunā gribim gūdeigys atbiļdis, kab varātu itū situaceju uzlobuot.”

Diskuseja “Kam juobyut, kab byutu ite?” byus 8. aprelī 13.00 Latgolys viestnīceibys GORS 3. stuova seminaru zālē, tuos dorba volūda – latgalīšu. Pasuokums ir bezmoksys, i tymā pīsadaleit var kotrys grybātuojs. Pīsadaleit diskusejā i paust sovu redzīni eipaši aicynuoti Latgolys jaunīši.

Diskuseja ir vīna nu latgalīšu kulturys kusteibys “Volūda” (bīdreibys “LgSC”) projekta “Latgaliskuos kulturvidis styprynuošona: sadarbeiba, izpratne i īsaiste” aktivitašu, kuru 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.