Atguojuse Donata dīna
Tai kai par Donata dīnys tradicejom ir moz viesturisku līceibu, tod suokam nu šudiņdīnys i taisam Donata dīnys pyuru!
1) Īsuokumam – Donata dīnys himna, kam obligati ir juobyut par Donatu. Ite vītā “Jis i jī kam nav bolsa” dzīsme “Donats”:
Jis i Ji Kam Nav Bolsa Donats by LgSC
2) Pyrmudīn izsludinuojom konkursu par Donata dīnys ticejumim. Paļdis tim, kas pasacente i īsyuteja sovys versejis! Rezultati byus zynomi šudiņ vokorā!
Donata dīnys ticiejumu konkursa pusfinala bolsojums: http://www.visidati.lv/aptauja/485009588/0/
Finals 18:00 kopejneicā „Ze Donats” (K.Valdemara īlā 18, Reigā). Atej ar sovim draugim i pīsadoli! Vinnēs lobuokī.
Ka gadīnī nateic iz finalu, ar uzvarātuojim sasazynuosim i vīnuosimīs par bolvys – donatu (virtuļu) komplekta sajimšonu!
Nu šudiņdīnys tod jamam vārā, ka:
- Ka Donata dīnā iessi virtuļus ar ibīzynotū pīnu, tod vosorā gūvs dūs daudzi pīna.
- Kas Donata dīnā ād virtuļus, tod tys ir lobs cilvāks.
- Ka Donata dīnā nasiedi sātā, tod vysu atlikušū godu byusi aktivs pasocīņu apmaklātojs.
- Ka Donata dīnā sātā Tev ir puors grādi syltuma, tod uorā ir -30 grādi.
- Ka Donata dīnā redzi vairuok kai treis jaunus Donatus – atīs veiksme, ka redzi vīnu godūs -gudreiba!
- Ka Donata dīnā nu reita nav apsamuocs i speid saule, tod tei speidēs vēļ vysu dīnu.
- Ka Donata dīnā Donats struodoi, tod jis nav vasals.
- Ka Donata dīnā nūgaršoj virtuli “Crazy Dazy”, nuokamajā godā piparmātrys aug grīzdamīs.
- Ka puiši Donata dīnā ād Šreka virtuli ar pistācejom, Juoņa dīnā sateik sovu princesi Fionu ar sīra rytuli.
- Ka mārgys Donata dīnā ād virtuli ”Ķiršu zebra”, pec nedelis sateik sovu sapņu puisi Einara Repšis uzvalkā.
- Ka Donata dīnā pagaršoj virtuli “Džons Lemons”, nuokamajuos Dzejis dīnuos saroksta Džona Lenona cīneigu dzejūļu kruojumu i sajam par tū treis ļimonus.
- Ka Donata dīnā stipendejis kai nav, tai nav, vakareņuos byus Studenta vyrtuļs.
- Ka Tev Donata dīnā kuojis nasolst, tei ir pyrmuo pazeime, ka juos byus soltys piec elektreibys riekina sajimšonys.
- Ka tovai kozai nav pīna, Donata dīnā malns kačs treis reizis juoapnas ap virtuļneicu ”Ze Donats” – pīns rassīs aumaļom.
- Ka šudin nasagryb struoduot, šudin ir Donata dīna.
- Ka Donata dīnā pasamūst taids Dūmeigs, Ospruoteigs, Naudeigs, Atplaucs, Trauksmains i Smaideigs, tod vyss var byut, ka pots esi Donats.
- Ka Donata dīnā pyrmajam satyktajam Donatam īčukst ausī sovu vysleluokū vieliešonūs i nūbučoj Donatu, jei pīsapylda kai lykts.
- Ka Donata dīnā, stuovūt iz vīnys kuojis ar sorkonu rūzis zīdu mutī, caur durvju škierbu izadūd īraudzeit plyku Donatu, tod tuo goda laikā apjimsi jū par veiru.
- Ka Donata dīnā veļ snīgs, tod paradzams, ka jis tyvuokajā laikā nūkuss.
- Ka Donata dīna nuok ar sauli i skaidra – tod Donata dīna juopavoda skaidrā.
- Donata dīnā ar snīga spanim juonūrumulej kaimini, tod napaīs ni pus goda i Tu tiksi pi jaunim kaiminim. (Voi ari, ka byusi cīši labi pasacentīs – nu kaimina tiksi vaļā jau Donata dīnā!
)
- DONATA dīna ir dīna “to DO NAT” (dīna, kab nadareitu tū, kū parosti nasagryb)
3) Reizem dzeivē vierteigys lītys atsarūn kai oklai vystai gryuds. Ite najaušs atradīņs – DONATA KUPLEJAS. Autors gon nazynoms, bet piec vysa sprīžūt nu Zīmeļlatgolys pusis.
Donata kuplejas par dzeivi Latgolā
oriģinaļnuos
(vītejā dialektā)
Sovā dzerevnē vīns pots
Dzeivoju jou trešīs gods,
Nav vairs veikala i počtas,
Tuoli juoīt tān da točkas.
Ustabeņai jumteņs bryuk,
Ratu reizi truba kiup.
Moskvičs pogolmā vairs naryuc,
Bendzins beidzīs, dzeļži saryus.
Pīdzīduojums (ar skaļu bļuovīni, tai nū sirds)
Ķeijā, traļļaļļā,
Slava myusu vaļdeibai!
Tuolredzeiga politika:
Poši rasni, tauta plyka!
Elektreibas nav jou godi,
Nūzogti nū stobim vodi,
Tai pa tymsu vīns pots sādu,
Ekanomeju – moz ādu!
Apsūleitī traknī godi
Pazudušs kai mežā strodi.
Sev soku: Donat, nebēdā,
Esam taču Eiropā!
Agruok mūsu cīmā beja:
Četrudesmit saimesteibas,
Divas permas, klubs ar kinu,
Bibļateks ar tanti Zinu,
Stanceja ar dzeļžaceļu,
I autabuss ar lelceļu,
Suokumskūla, četras klases,
Punkts, kur izdūd zyrgu pases.
Tādiņ myusu cīmā dryumi,
Apleik tikai kuorklu kryumi,
Upē savīsušīs bebri,
Vysur naizbrīnami dzebri.
Taidā vītā dzeivuot velim,
Kūki aug pa slīžu celim,
Permas sakritušas obas,
Vuss tys nav nū dzeives lobas.
Pyrms treissimt godīm Lelīs miers,
Bej myusu puses ļaužus kiers,
Nuoce naskaitomi kari
Boda laiki cīši gari,
Kolhozi i Sibireja,
Vusu toutu naiznīdeja,
Beidzūt pošu muojas sučkas
Laukus davede da ručkas.
Kur ni verīs, vysur klusi,
Process īt iz vīnu pusi.
Runoj, piec sekretnīm plānīm,
Itai vītā juobūt klānīm.
Cylvāki te troucej dobai,
Politiķu dzeivei lobai.
Tuopiec svareiguokuo līta,
Panuokt, lai te tukša vīta.
Piec socelizma sabrukuma,
Cylvāki ni vusai skuma,
Breša zemnīki ar sporu,
Toutas pacāluma goru,
Zemi ora, groudus sieja,
Courom dīnom svīdrus lieja,
Cikom vīndīn apsajēdze,
Ka vaļdeiba jūs apjuoja…
Vari struoduot tu, cik gribi,
Beiguos dabuosi tik pigu.
Taidi, taņteņ, lykumi,
Ka palīk tikai plykumi.
Kur ni verīs, Saeimā, VIDā,
Vaļdeibā voi mūsu PIDā,
Vysur devaļvaceja,
Splašnaja degradaceja.
Deļto, ka struoduot navā jāgas,
Touta prūm nū cīma bāga,
Iz Bolvīm, Reigu, Viļaku,
Īreju i Angleju.
Ka jou itaidas tuos lītas,
Krušok prūm nū pūsta vītas,
Vusi tādiņ prūjom ira,
Beidzamī iz vītas myra.
Skaidrā pruotā itū radzūt,
Gribīs pazakuortīs beidzūt.
Golvu cylpā buozt nav labi,
Atlīk viņ kai izdzert šņabi.
A pret taidu politiku
Jaunuotne līk narkotiku.
Ka jou vuss te īt iz pūstu,
Lobuok tod es leimi ūstu.
Soka deputats iz manīm,
Nastaigoj ar courīm štanīm,
Roksti Jevra projektu,
Dabyus bikšom īluopu.
Vusu godi raksteju,
Da jabatj tū birokrateju!
Kamer vusu saskaņuoju,
Desmit opisus apjuoju.
Symtu latu papeiram i tiņtei,
(byutu gona jounai plintei),
Kūpā tiereits symti pīci,
Leidz pi projekta tu tīci,
Tikai beiguos švakas zines:
Nav nū īluopa ni mines,
Jevranauda kaut kur klusi
Reigas pusie pazudusi!
Tykuši pī plotuos siles,
Cytīm naatstuoj ni piles,
Laukūs touta trešuos škiras,
Jīm lai palīk vušku spyras.
Golvanīs ar toutas montu
Papyldynuot sovu kontu.
Kod te beidzūt suoksīs fonti,
Vepri biegs, kur pilni konti.
Nav jou tai, ka naatrost dorbu,
Var syudu myusas sist ar torbu,
Tikai piečuok navāg rouduot,
Ka namoksoj par itū noudu!
Kod dzeivei jāgas nav nikur,
Kai lai toutu rāmjūs tur?
Vairs naleidz struopes, styngrīs lykums,
Straujūs tempūs kreituos tykums.
Vīndīn bibļatekas Zina
Pībrouc jounā limuzinā,
Vaicoj: Donat, tu vīns pots?
Atbildu: jou trešīs gods,
Anele i Zose kopūs,
Citi aizalaide lopuos.
Prīceigi, ka prūjom tyka,
Taida myusu politika!
Tīm, kas dūmoj, ka es sajucs,
Klabynu kai stobā kaļusts,
Tī lai brouc iz mūsu cīmu,
Padzeivoj te godi vīnu.
Poši palyukoj tū laimi,
Smeļt iudini ar couru spaini.
Ministri i deputati,
Vusi laipni aicynuoti!
Pīdzīduojums (ar skaļu bļuovīni, tai nū sirds)
Ķeijā, traļļaļļā,
Slava myusu vaļdeibai!
Tuolredzeiga politika:
Poši rasni, tauta plyka!
Foto – Vita Briška (nu fotokonkursa “Eiropa Latgalē: Lobs loba namaitoj” orūdim)
4) I zam beigu vēļ koč kas nu Zīmeļlatgolys gola. Na gluži par Donatu, bet varbyut kaidam Donatam nūdar: padūmi kai nūcopēt meitušku!
Ļusteigu i saulainu Donata dīnu!
Komentari