Roksta autore: Laura Melne, portals lakuga.lv

Izdevnīceibā “Valters Dakša” izdūta Eināra Pelša, kurs zynoms ari kai Sirsniņa, treispadsmytuo gruomota ar nūsaukumu “365,2425”. Izdeviejs tū pīsoka kai idealu plānuotuoju sevkuram godam i nūruoda, ka tei ir bīzuokuo i smoguokuo gruomota latvīšu literaturā. Tamā atrūnami ari teksti latgaliski.

Plānuotuojs “365,2425” asūt sinkretisks vizualuos muokslys, dzejis, atdzejuojumu, konkretisma i konceptualisma megalits, tuo svors – 5 kg, bīzums – 11 cm, formats – A4, puslopu skaits – 500. Kotrai goda dīnai veļteita vīna voi vairuokys puslopys, kas īprīcynoj skaiteituoju. Kai soka izdeviejs Valters Dakša: “Koč kas taids latvīšu literaturā nav bejs i nabyus, cikom naizīs jaunuokais Eināra Pelša saryupātais puorsteigums apstulbynūšys dzejis cīneituojim.”

Einārs Pelšs ir dzejnīks i atdzejuotuojs, Preiļu konceptualistu grupiejuma lūceklis, magnats-mūceklis. Juo dzejis kruojumi “Mīļākais tētis pasaulē” (2016), “Demon. Condom” (2017), “Rembo 2016” (2018), “52 nedēļas” (2020, kūpā ar Andi Surguntu). Aktivi atdzejoj kai krīvu modernistus, tai ari laikmeteigū dzeju (Igors Severjanins, Nikolajs Gumiļovs, Mihails Kuzmins, Osips Mandelštams, Daniils Harmss, Linora Goralika, Galina Rimbu, Andrejs Sen-Seņkovs). Kruojums “Demon. Condom” sajiems gruomotu muokslys konkursa “Zelta ābele 2017” specialū bolvu “Mežābols”, bet par gruomotu “Rembo 2016” autors 2019. godā sajiems Dzintara Soduma bolvu. Eināra Pelša dzeju latgaliski var puorskaiteit ITE.

Sadarbeibā ar izdevieju Valteru Dakšu Pelšam izguojuse vasala vērtine natradicionalu gruomotu. Ka 2017. godā kaidam vēļ naparostai ruodejuos, ka kruojumam “Demon. Condom” tyka dalykts kluotyn eists prezervativs (tei beja Pelša i Dakšys pyrmuo sadarbeiba) voi godu vāluok “Rembo 2016” vuoks atguodynuoja videokasetis vuoceņu, tod niu vaira napuorsteidz, ka Pelša jaunuo gruomota varātu pat nabyut gruomota. Precedents jau ir – 2021. godā izdūtuo “Janka”, kurys golvonuo sastuovdaļa izaruodeja cegls tīšā, na puornastā nūzeimē. Naparosts izdavums ir ari tymā pošā godā radeituo “Gramota” – kotrs interesents var tikt pi Pelša paraksteita gūda roksta ar jam rakstureigu vieliejumu. Taipat bejušys ari dzejis spēļu kartys, i nav švuorbu, ka iz prīšku myus sagaida vēļ vys koč kas interesants. Pelša gruomotuos izmontuota na tik raksteituo vuorda, tok ari vysaidu grafisku i škārsteiklā atrostu zeimu vareibys, taidā veidā padorūt plašuokus latvīšu myusu dīnu dzejis rūbežus.

Eināra Pelša dzeja latgaliski vysplašuok atrūnama juo kūpuotūs rokstu siejumā “Digi Dīgi” (2020), kur tai veļteita pat atseviška nūdaļa. Naformaluos sarunuos izdeviejs Valters Dakša ir sacejs, ka koč kod vajadzātu izdūt ari kaidu Pelša gruomotu tikai latgaliski. Kod niu par tū atguodynoju, Valters stuosta, ka taida nūteikti byus. Cik dreiži? Tys atkareigs nu Pelša. Tikom pats autors iz munu rakstiskū vaicuojumu, voi kaidreiz varim sagaideit ari gruomotu latgaliski, atbiļdēja: “Es pots nazynu, kū nu sevis varu sagaideit. :)” Valters Dakša stuosta, ka sevkurā gadīnī Pelšs jau gatavej sovu nuokušū gruomotu. Tai kai jam godā tuos izīt apmāram 2–3, tys ir piļneigi logiski. “365,2425” itūgod ir jau ūtruo, jo goda suokumā izdūtys Eināra Pelša “Dzejas lekcijas”.

Gruomota “365,2425” izdūta ar Vaļsts kulturkapitala fonda paleigu. Gruomotu var nūpierkt galerejā “Istaba” i izdevnīceibā “Valters Dakša”.