Roksta autore: Veronika Dundure, Latgalīšu volūdys, literaturys i kulturviesturis školuotuoju asociacejis (LVLKŠA) vaļdis prīšksādātuoja

29. apreļs – saulaina i sirsneiga dīna latgalīšu volūdys gūdynuošonai – suocēs ar dzejneicys Annys Rancānis uzrunu i dzīsmi “Skaidruo volūda”. Jau divdesmit trešū godu LVLKŠA organizej skotuvis runys konkursu “Vuolyudzāni” i olimpiadi latgalīšu rokstu volūdā i kulturviesturē. Itūgod skotuvis runis konkursā pīsadaleja  43 vuolyudzāni nu 21 izgleiteibys īstuodis (Aglyunys Katuoļu gimnazeja, Baļtinovys v-šk., Bierzpiļs p-šk., Rekovys v-šk., Ruguoju v-škola, Viļakys Vaļsts gimnazeja, Bieržgaļa p-šk., Gaigalovys p-šk., Drycānu v-šk., Nautrānu v-škola, Viļānu Muzykys i muokslys škola, Rēzeknis 5. v-škola, Cyblys v-šk., Kuorsovys v-šk., Ludzys piļsātys v-šk., Ludzys Muzykys p-škola, Mežavydu PII, Špogu v-škola, Rībeņu v-škola, Kruoslovys gimnazeja, Tukuma E.Birznieka- Upīša p-škola). Lela prīca vysim beja par pasuokuma atsagrīzšonu kluotīnē.

Konkursu pa vacuma grupom viertēja dzejneicys Anna Rancāne i Līvija Liepdruviete, Rēzeknis Tautys teatra režisore Māra Zaļaiskalns i aktrise Vija Dikule, Latvejis Radejis Latgolys studejis vadeituoja Renāte Lazdiņa i producents Guntis Rasims. Vuolyudzāni beja izavieliejuši skaiteit Ontonu Slišānu, Anneli Slišāni, Mariju Dzeislu, Inetu Atpili –Jugāni, Ilzi Spergu, Janu Skrivļu-Čeveri, Raibū, Valentinu Lukaševiču, Intu Naglu, Ontonu Kūkuoju i cytus autorus. Tikai daži skaiteja i fabulys.

Renāte Lazdiņa atzeist: “”Vuolyudzāni” ir breineigs bārnu konkurss, kurs, paļdis Dīvam, otkon atsagrīzs kai kluotīnis pasuokums. Kluotīnē auditorejis prīškā uzastuot ir vierteiguok. Itymā godā mozī vuolyudzāni beja labi sasagatavejuši i nūviertēt lobuokū nabeja vīgls aizdavums, taipoš ari izvālātuo literatura beja interesanta i laikmeteiga. Itys dzejis skaiteišonys konkurss deļ bārnu i vysys sabīdreibys ir cīši svareigs, tai kai latgalīšu volūdai i literaturai dadūd nūzeimeigumu taišņi bārnu i školuotuoju acīs.”

Māra Zaļaiskalns pastreipoj: “Cīši daudzveideiga programa, vacumam atbylstūši izvālāti teksti! Spieja atvērt sovu pasauli, sovu personeigū attīksmi pret izvālātū materialu. Prīcynoj teira volūda! Datryukst prasmis uzastuot publikys prīškā, nūturēt klauseituoja viereibu. Paļdis vysim školānim, školuotuojim, organizatorim par īspieju byut kūpā itymā cīši byutiskajā procesā.”

Guntis Rasims soka: “Latgalīšu runys konkurss “Vuolyudzāni” i latgalīšu volūdys i kulturviesturis olimpiade jau daudzi godu ir breineiga īspieja bārnim i jaunīšim styprynuot sovu pošapzini, nūvoda identitati i lokalū patriotismu. Sovā saziņā puorsvorā runoju ar vysim latgaliski – voi tys ir dorbs Rēzeknis nūvoda dūmī, voi organizejūt kulturys i izgleiteibys pasuokumus i projektus vysā Latvejā. Tam vajadzeiga zynoma drūsme i puorlīceiba. Varu viņ pasateikt “Vuolyudzānu” organizatorim par sovulaik pošam dabuotū pīredzi itymā konkursā.”

 Skotuvis runys konkursa rezultati:

22. vaļsts atkluotajā latgalīšu volūdys i kulturviesturis olimpiadē itūgod pīsadaleja septenis komandys (Baļtinovys v-škola, Drycānu v-škola, Kruoslovys gimnazeja, Ludzys piļsāts v-škola, Nautrānu v-škola, Rekovys v-škola, Rēzeknis Vaļsts 1.gimnazeja).

Olimpiadē otkon beja pīcys kuortys. 1. kuortā školāni atkluoja sovys prasmis latgalīšu rokstu volūdys pareizraksteibā, 2. kuorta beja veļteita kinai “Latgalīši Sibirī”, 3. kuortā vydsškolāni veica aizdavumus par Ontona Slišāna gruomotu “Čipierkstneits jeb apcirsto sakņu pieaudzēšana”, 4. kuortā vajadzēja īpazeit Annelis Slišānis “100 deči Latvejai”, bet 5. kuortā beja Latgolys kulturtests par latgaliskajom aktivitatem 2022. godā, kū sagataveja latgalīšu kulturys ziņu portals lakuga.lv. Aizdavumus izstruoduoja profesoris Lideja Leikuma i Ilga Šuplinska i portala lakuga.lv redaktore Laura Melne. Vydsškolāni atzeist, ka aizdavumi beja interesanti, bet gona gryuti.

Profesore Lideja Leikuma stuosta: “Itūgod vairums olimpiadis aizdavumu — tai voi cytaiži — saistejuos ar Slišānim, kas, teoretiski jamūt, varēja dūt lelys prīškrūceibys komandom nu Zīmeļlatgolys. Tok nā, i itys apstuoklis lītu paruoda kai objektivu byušonu!… Deļ loba rezultata ir vajadzeiga nūpītna pīeja gatavejūtīs — vīna pādejuo vokora var izaruodeit stypri par moz, taipat vajadzeiga Latgolā nūteikūšuo loba pazeišona — jaunuokūs laiku i saisteibā ar LVLKŠA pīduovuotajom temom. Paļdis vysom septeņom olimpiadis komandom i paļdis jūs gataveituojim školuotuojim! Paļdis latgalīšu perpetuum mobile jau tik daudzu godu garumā — Ilgai Šuplinskai i LgSC (kusteiba „Volūda“) aktivistem, kas nūvadeja kulturtestu! Paļdis atsauceigajai Rēzeknis Vaļsts 1. gimnazejai (direktors Juoņs Poplavskis)!”

Profesore Lidija Leikuma ir olimpiadis vārtātuoja jau nu 2001.goda, jai itys ir gūda pasuokums, ir gondarejums redzēt, ka jaunīši jau divdesmit treis godus vuicuos latgalīšu volūdu i kulturviesturi (koč i fakultativi).

Nu 100 punktim, kū varēja dabuot olimpiadis kuortuos,

1. vīta ar 81p. – Nautrānu v-školai (Rinalds Ludboržs, Alise Mazure. Rūta Vonoga i Renārs Jurdžs), šk. V. Dundure;

2. vīta ar 73.5 p. – Drycānu v-školai (Arnolds Anufrijevs, Raitis Igaunis, Krista Kokina, Egita Melne, Elgars Razgalis), šk. S. Laizāne;

3. vīta ar 69 p. – Ludzys piļsātys v-školai (Alise Alitkina, Sanda Augustova, Kamila Makarova, Laura Mortuzāne, Rasma Vonda), šk. L. Budreviča.

Paļdis Imantam Slišānam, Evikai Muizniecei, Anitai Koniševai, Ingai Skerškānei i Ilgai Stikutei par īguļdeitū dorbu, lai sagataveitu vydsškolānus olimpiadei.

Leluokais paļdis ir Ilgai Šuplinskai, Lidijai Leikumai i Laurai Melnei par aizdavumu sagataveišonu olimpiadis kuortom. Parosti pīsadolūt vuiceibu prīkšmatu olimpiadēs, školāni i školuotuoji nikod nazyna, kas ir gatavejs aizdavumus. Ar vuolyudzānim pauzēs spielēja i rūtaļuos guoja Ēriks Zeps ar Madaru Brolišu i Vuorna (Vanda Žulina). Jim lels paļdis!

Paļdis Rēzeknis nūvoda pošvaļdeibai, kura kotru godu finansiali atbolsta skotuvis runys konkursu “Vuolyudzāni” i vaļsts atkluotū olimpiadi latgalīšu rokstu volūdā, Rēzeknis Vaļsts 1.gimnazejai, par bolvu saryupiešonu  – Rēzeknis Tehnologeju akademejai, interneta veikalam “Taiseits Latgolā” (Artim Loginam), z/s “Kotiņi”, SIA “Madara LV”, Latgolys Kulturys centra izdevnīceibai i žurnalam “A12” (redaktorei Inārai Grocei).

Olimpiadis aizdavumus varēs skateit ltgasoc.lv