Dzīsme ar Ontona Kūkuoja vuordim – nūslādzūšais skaņdorbs “Bez PVN” jaunajā albumā
Rokstu sagataveja: portals lakuga.lv
Šudiņ, 18. majā, grupa “Bez PVN” publicej dzīsmis “Tu i es” video – skaņdorbu ar Ontona Kūkuoja vuordim i Kristapa Rasima muzyku. Kai viestej grupys publicātuo informaceja, “Tu i es” ir nūslādzūšais skaņdorbs jaunajā grupys albumā “Paraleli horizonti”.
Dzīsmis “Tu i es” video radzami kadri nu 2020. godā radeituos dzejis izruodis “Pa mīlesteibu brīnūt, kuojis nasaļ” ar Kristapa Rasima muzyku i Ontona Kūkuoja dzeju. Ari poša dzīsme sovulaik radeita taišni itai izruodei, kas beja kūpeigs projekts kūpā ar Ontona Kūkuoja dzejis kruojuma “Mīlesteiba – Lelais Līpu kolns” izdūšonu.
Dzīsmis muzykys autors Kristaps Rasims stuosta: “Izruodis “Pa mīlesteibu brīnūt, kuojis nasaļ” stuosts ir par divejim cylvākim – meitini, kur ir nadzierdeiga, i zānu, kurs dzierd. Dzīsmis video radzamuo meitine Jolanta Znuotiņa (Znotiņa) beja radzama ari myusu dzīsmis “Pīci elementi” videoklipā, kurs sovulaik roduos jau piec dzejis izruodis veiduošonys. Niu mes ar grupu “Bez PVN” gribim itai dzīsmei īdūt jaunu skaniejumu.” Dzīsme “Tu i es” īraksteita studejā “Reiga”, bet tuos apstruodi taisejs Armands Treilihs.
Izruode “Pa mīlesteibu brīnūt, kuojis nasaļ” sovulaik tyka fiļmāta Latgolys viestnīceibā “Gors”, i Kristaps ir pateiceigs vysai izruodis veiduotuoju komandai: Sandrai Vorkalei, Marikai Čeņavskai, Arinai Bubovičai, Mārim Justam, Ervīnam Šaicānam, Normundam Pucim i ari pošam Ontonam Kūkuojam.
Atguodynuosim, ka pyrma mieneša, 18. martā, grupa izsludynuojuse albuma “Paraleli horizonti” prezentacejis svātku koncertu 18. oktobrī Reigā, koncertzālē “Palladium”. Gaidomais koncerts byus naviņ jaunuo albuma atruodeišona, bet ari dzīšmu vysaida veida interpretaceju izskaniešona. Koncertā gaidomī gosti – “Latgalīšu Reps”, Diona Liepiņa i Valters Pūce. Īīšona koncertā byus nu 19.00. Beletus iz “Paraleli horizonti” prezentacejis svātkim var nūpierkt “Biļešu Paradīze” beletu kasēs i škārsteiklā ITE, cena nu 20,00 da 30,00 eiro (pyrmūs 100 beletu cena 20,00 eiro). Kai poši grupys dalinīki soka, tod grupys jaunais albums “Paraleli horizonti” ir kovida īrūbežuojumu i sātā siediešonys laikā pīdzymušūs “Bez PVN” dzīšmu apkūpuojums.
Taipat juoatguodynoj, ka grupys “Bez PVN” i dzīduotuojis Dionys Liepinis kūpeiguo dzīsme “Šaļti” ir vīna nu Latvejis Radejis 2 dzīšmu aptaujis “Muzykaluo banka 2023” topa dzīšmu, kuru par tikšonu aptaujis finalā, kotru dīnu bolsojūt, var atbaļsteit LR2 sātyslopā ITE. 2006. gods suokuos “Muzykalajā bankā” par vierteiguokū 2005. gods dzīsmi tyka atzeita grupys “Borowa MC” hits “Vysskaistuokajai meitinei”. Nivīnai cytai dzīsmei latgaliski tys piečuok vaira nav īsadevs. Pārn aptaujis finalā latgaliski izskanēja grupys “Tautumeitas” i dzīduotuoja Renāra Kaupera dzīduotuo “Muoseņa”, kas golā dabuoja 6. vītu.
